იმისათვის, რომ საქართველო რეგიონში გახდეს ცენტრი ამისათვის მთავრობა ავტომობილების ნულოვან განბაჟებაზე 20 დღიან ვადას 45 დღემდე ზრდის. როგორც მთავრობის სხდომის დაწყების წინ პრემიერ- მინისტრმა ნიკა გილაურმა განაცხადა რეექსპორტის მხრივ პირველ ადგილზეა უკვე ავტომობილები და საქართველო ფაქტობრივად გახდა ცენტრი ბევრი საავტომობილო კომპანიებისათვის.
"იმისათვის, რომ რეექსპორტი გაიზარდოს და საქართველოში მოხდეს შემოყვანა, დასაწყობება და შემდეგ მისი გაყვანა სომხეთში, აზერბაიჯანში და შუა აზიის ქვეყნებში ამისათვის ჩვენ მნიშვნელოვანი ნაბიჯები უნდა გადავდგათ, რაც ქვეყნის ეკონომიკაში დიდ შემოსავალს ტოვებს. ჩვენ გვინდა რომ ამ ბიზნესს საქართველოში მუშაობა გავუმარტივოთ და გადამზიდავებს ნულოვანი განბაჟებისთვის 20 დღიანი ვადა 45 დღემდე გაეზრდებათ. ეს სიახლე გვინდა შევთავაზოთ კომპანიებს და ამ ბიზნესის წარმომადგენლებს რათა მათ უფრო გაუადვილდეთ ბიზნესის წარმოება საქართველოში და გახსნან უფრო კონკურენტუნარიანები ამ რეგიონში", - განაცხადა ნიკა გილაურმა.
პრემიერ-მინისტრის განმარტებით, ამ რეგულაციების შემდეგ, შესაძლოა საქართველო რეგიონში არა მარტო ავტომობილების ექსპორტის მხრივ, გახდეს ცენტრი, არამედ სხვა ინდუსტრიების კუთხითაც.
როგორც გილაური განმარტავს, საქართველოს ხელისუფლება ყველაფერს აკეთებს იმისათვის, რომ ინვესტორებს საქართვლოში მუშაობა გაუმარტივდეს და სწორედ ამ მიზანს ემსახურებოდა მისი ვიზიტი ჩინეთსა და ინდოეთში.