მთავრობა 2010 წლის 10 თვის მაკროეკონომიკური მაჩვენებლებით კმაყოფილია. როგორც დღეს მთავრობის სხდომაზე პრემიერ-მინისტრმა ნიკა გილაურმა განაცხადა, რომ 2010 წლის იანვარ-ოქტომბერში 2009 წლის წლის იანვარ ოქტომბერთან შედარებით 38 პროცენტით მეტი ვიზიტორი შემოვიდა.
"რაც ნიშნავს იმას რომ ტურიზმი იზრდება და ჩვენ ვვარაუდობთ, რომ წლის ბოლომდე ქვეყანაში ტურისტების რაოდენობა 2 მილიონს გადააჭარბებს და ეს იქნება რეკორდული მაჩვენებელი საქართველოსთვის", - განაცხადა ნიკა გილაურმა.
პრემიერ-მინისტრის განმარტებით, გაზრდილია ასევე ტრანზაქციები უძრავი ქონების ბაზარზე და ავტომობილების რეგისტრაციაში.
გილაურის განმარტებით, 2010 წლის 10 თვეში 2009 წლის 10 თვესთან შედარებით უძრავი ქონების ბაზარზე რეგისტრაცია 23 პროცენტითაა გაზრდილი. ხოლო ავტომობილების რეგისტრაცია 33 პროცენტით.
"სტაბილურად ვითარდება ასევე ექსპორტი. ჯამში 2010 წლის 10 თვეში ექსპორტი 33 პროცენტითაა გაზრდილი. ეს გამოწვეულია არა მხოლოდ ფასების ზრდით, არამედ იმითაც რომ საქართველოდან გაცილებით მეტი დასახელების პროდუქცია გადის და ასევე გაზრდილია საექსპორტო ქვეყნების არეალიც", - განაცხადა ნიკა გილაურმა.
