1-ლი დეკემბრიდან სურსათის უვნებლობის სამსახური საჯარო სამართლის იურიდიულ პირად "სურსათის უვნებლობის სააგენტოდ" ოფიციალურად გადაკეთდება. ამის შესახებ განცხადება დღეს მთავრობის სხდომის დაწყების წინ სოფლის მეურნეობის მინისტრმა ბაკურ კვეზერელმა გააკეთა.
მინისტრის ინფორმაციით ახალი სააგენტო მომხმარებელზე ორიენტირებული უწყება იქნება.
"სურსათის უვნებლობის კანონი ეტაპობრივად უნდა ამოქმედდეს და პირველი ეტაპი არის ის რომ სურსათის უვნებლობის სამსახური 1-ლი დეკემბრიდან ოფიციალურად სურსათის უვნებლობის სააგენტოდ გადაკეთდება. ეს არ იქნება დამატებითი ბიუროკრატია და ახალი უწყება, იქნება საკმაოდ მოქნილი და მომხმარებელზე ორიენტირებული", - განაცხადა კვეზერელმა.
მინისტრის თქმით, სურსათის უვნებლობის კანონის ცალკეული მუხლები ეტაპობრივად შედის ძალაში და სამომავლოდ ადგილზე წარმოებული პროდუქციის შემოწმება მონიტორინგიც დაიწყება.