ზაფხულის აქტიურ ტურისტულ სეზონზე Le Meridien Batumi 100%-იანი დატვირთულობით მუშაობს. სასტუმროს სტუმრების 60%-ს უცხოელი ვიზიტორები შეადგენენ და როგორც Le Meridien Batumi-ს მარკეტინგის დეპარტამენტის ხელმძღვანელი კატია აბსანძე ამბობს, ქვეყანაში გართული ეპიდვითარების ფონზეც კი ჯავშნების გაუქმება დღეისათვის არ ფიქსირდება.
"ამ ეტაპზე ცვლილებები არ გვაქვს და ჯავშნები არ გაუქმებულა. ზაფხულის ტურისტული სეზონი ჯავშნების მხრივ საკმაოდ დატვირთული გვქონდა და გვაქვს კიდევაც. მას შემდეგ რაც ისრაელის მთავრობის მხრიდან საქართველოს "წითელი” ქვეყნების სიაში გადაყვანა დაანონსდა, სადაც ისრაელელი ვიზიტორებისთვის გამგზავრება ნებადართული აღარ იქნება (გამონაკლისი შემთხვევების გარდა), ჯერჯერობით ეს ჩვენს ჯავშნებზე არ ასახულა, თუმცა ცხადია ცვლილებებს ველოდებით.
სასტუმრო 100%-ითაა დატვირთული. ქვეყანაში ეპიდვითარების გაუარების შემდეგ ჯავშნებთან მიმართებაში ცვლილებები არ არის, რადგანაც სასტუმროში წესების განსაკუთრებული დაცვაა. პირველი ის, რომ ჩვენ ვიცავთ საქართველოს ჯანდაცვის სამინისტროს მიერ შემუშავებულ რეკომენდაციებს და მეორე, Marriott-ის მხრიდან გვაქვს გაწერილი ჩვენი შიდა პოლიტიკა, რომელიც აორმაგებს და ამკაცრებს ამ რეგულაციებს. სანდოობის მხრივ ჩვენი მაჩვენებელი საკმაოდ მაღალია და Le Meridien Batumi-ს დამსვენებლები უსაფრთხოდ გრძნობენ თავს", - აცხადებს კატია აბსანძე.
