სვანეთში 600-მეგავატიანი ჰიდროელექტროსადგური აშენდება. ამის შესახებ განცხადება საქართველოს პრეზიდენტმა "თავისუფალ უნივერსიტეტში" პროფესორ-მასწავლებლებთან და სტუდენტებთან შეხვედრისას გააკეთა.
პრეზიდენტის განმარტებით, აღნიშნული ჰესი სვანეთში მდინარე ნენსკაზე აშენდება.
"მომავალ წელს სვანეთში, ნენსკაზე, 600-მეგავატიანი ჰიდროელექტროსადგურის მშენებლობას ვგეგმავთ, რაც 600-800 მლნ დოლარის მოზიდული ინვესტიციაა", - განაცხადა სააკაშვილმა.
პრეზიდენტმა ყურადღება გაამახვილა იმაზედაც, რომ მომავალ წელს რამდენიმე ახალი ჰესის მშენებლობა იწყება, რაც საქართველოს ენერგომომარაგების მხრივ წინ გადადგმული ნაბიჯია.
"20111 წლის ბოლოს ან 2012 წლის დასაწყისში "ხუდონჰესის" მშენებლობა დაიწყება, რომელიც 900 მეგავატ ელექტროენერგიას გამოიმუშავებს. პროექტისთვის 800 მლნ. დოლარამდე ინვესტიცია განცორციელდება. იმედია, მომავალ წელს "ნამახვანის" მშენებლობაც დაიწყება. ეს არის 700-800 მლნ დოლარის ინვესიცია. ახლა ფულის მობილიზაცია
ხდება. ჰესების მშნებელობაზე 100 ათასობით ადამიანი დასაქმდება", - განაცხადა სააკაშვილმა.