ჩინეთთან მოლაპარაკებების წარმატებით დასრულების შემთხვევაში, საქართველოში დამატებით 500-600 მილიონი დოლარის ინვესტიცია შემოვა. ამის შესახებ საქართველოს პრეზიდენტმა მიხეილ სააკაშვილმა "თავისუფალ უნივერსიტეტში" ვიზიტისას განაცხადა.
"ტურიზმის განსავითარებლად აუცილებელია ინფრასტრუქტურის მოწყობა. ჩინეთთან თუ მოლაპარაკებები წარმატებით ვაწარმოეთ, საქართველოში დამატებით 500-600 მილიონი დოლარის ინვესტიცია შემოვა. დამატებით 40 მილიონი ტონა ტვირთი შემოვიდა ჩვენს პორტებში. აეროპორტები, რომლებიც შენდება, არის ამ ტურისტული ინფრასტრუქტურის განვითარების ერთ-ერთი მნიშვნელოვანი გზა", - განაცხადა სააკაშვილმა.
სააკაშვილმა ისაუბრა ჯავახეთში რეაბილიტირებულ გზაზე. მისი თქმით, ეს გზა ჯავახეთში ტურიზმის განვითარებას შეუწყობს ხელს.
"კიდევ გვაქვს სასწაულები, რომლებიც უნდა აღმოვაჩინოთ. შეიძლება ჩავატაროთ გათხრები ჯავახეთში და შეიძლება აღმოჩნდეს უნიკალური ადგილები. ჩვენ არ ვიცოდით ახალქალაქი საერთოდ. იქ გაკეთდა გზა. სწორედ ამ გზით ხდება ჯავახეთში ტურიზმის განვითარება", - დასძენს პრეზიდენტი.
