ფინანსთა მინისტრი კახა ბაინდურაშვილი და შემოსავლების სამსახურის უფროსი გიორგი ცხაკაიას სომხეთში ერთდღიანი სამუშაო ვიზიტის ფარგლებში სომხეთის საბაჟო-საგადასახადო კომიტეტის სამსახურის უფროსთან გადიკ ხაჩატურიანს შეხვდნენ.
მხარეთა შორის საუბრის მთავარი თემა ორი ქვეყნის საბაჟო-გამშვები პუნქტების ერთობლივი მართვა და საბაჟოებზე ევროპული სტანდარტების დანერგვის საკითხები იყო. როგორც შეხვედრაზე აღინიშნა, ორივე ქვეყანა გამოთქვამს მზადყოფნას, გამარტივდეს საბაჟო პროცედურები და შემცირდეს საბაჟო კონტროლის ღონისძიებები გამშვებ პუნქტებზე.
შეხვედრაზე მხარეები შემთანხმდნენ ქართული და სომხური სამუშაო ჯგუფების ფორმირებაზე, რომლებიც იმუშავებენ საქართველოსა და სომხეთს შორის საბაჟო-გამშვები პუნქტების ერთობლივად მართვის შესახებ შეთანხმების ტექნიკური და იურიდიული დეტალების მომზადებაზე.
საქართველოსა და სომხეთს შორის საბაჟო-გამშვები პუნქტების ერთობლივი მართვა მომავალში ხელს შეუწყობს ორ ქვეყანას შორის სავაჭრო-ეკონომიკური ურთიერთობების ინტენსიფიკაციას, ასევე მოსახლეობის თავისუფლად გადაადგილებას საზღვარზე.