ჯანმრთელობის მსოფლიო ორგანიზაციის გენერალური დირექტორი, ტედროს ადანომ ღებრეიესუსი, ტოკიოს ოლიმპიური თამაშების წინ, საერთაშორისო ოლიმპიური კომიტეტის წინ სიტყვით გამოვიდა.
ღებრეიესუსმა სიტყვით გამოსვლისას, გლობალურ ჯანდაცვაში არსებულ გამოწვევებზე ისაუბრა და ყურადღება გაამახვილა ვაქცინების განაწილების საქმეში უთანასწორობაზე.
ჯანმრთელობის მსოფლიო ორგანიზაციის ხელმძღვანელის თქმით, ვირუსის გავრცელების მაღალი ტემპების გათვალისწინებით, მოსალოდნელია, რომ ახალი უფრო საშიში შტამები გამოჩნდეს.
"რაც უფრო მაღალია ვირუსის გადაცემა, მით უფრო მეტი ახალი ვარიანტი გამოჩნდება, რომლებიც პოტენციურად უფრო საშიშები იქნებიან, ვიდრე დელტა ვარიანტია, რომელიც ასეთ დამანგრეველ შედეგებს იწვევს.
რაც უფრო მეტი ახალი ვარიანტი გამოჩნდება, მით უფრო მაღალია ალბათობა, რომ რომელიმე ახალი შტამის მიმართ ვაქცინა აღარ იქნება ეფექტური და ყველანი კვლავ საწყის მდგომარეობას დავუბრუნდებით", - თქვა ღებრეიესუსმა.
ჯანმრთელობის მსოფლიო ორგანიზაციის მონაცემებით, გასულ ერთ კვირაში მსოფლიოში აღირიცხა COVID-19-ის გამომწვევი კორონავირუსით ინფიცირების 3 429 645 შემთხვევა, რაც წინა კვირასთან შედარებით 12%-ით მეტია.