"საქართველოს მთავრობასა და ჩეხეთის რესპუბლიკის მთავრობას შორის საჰაერო მიმოსვლის შესახებ" ხელშეკრულება გაფორმდა.
აღნიშნული დოკუმენტი წარმოადგენს ლეგალურ ბაზას ქართული და ჩეხური ავიაკომპანიებისათვის, რათა მათ განახორციელონ საჰაერო მიმოსვლა ორ ქვეყანას შორის. ხელშეკრულება ორივე ქვეყნის ავიაკომპანიებს საშუალებას მისცემს, რეისები განახორციელონ წინასწარ დადგენილი კვოტების გარეშე. ამასთან, საქართველოსა და ჩეხეთის რესპუბლიკას შორის ფრენის რეჟიმის ლიბერალიზება, რის გარანტიასაც ხელმოწერილი დოკუმენტი იძლევა, საშუალებას მისცემს ავიაკომპანიებს, საკუთარი შეხედულებით განსაზღვრონ ფრენის სიხშირე და მომსახურების ტარიფი.
საქართველოს მხრიდან დოკუმენტს ხელი მოაწერა ეკონომიკისა და მდგრადი განვითარების მინისტრმა ვერა ქობალიამ, ჩეხეთის მხრიდან კი ჩეხეთის რესპუბლიკის საგანგებო და სრულუფლებიანმა ელჩმა საქართველოში ივან იესტრაბმა.
როგორც საქართველოს ეკონომიკისა და მდგრადი განვითარების მინისტრმა აღნიშნა, ავიაკომპანიებს შორის კონკურენცია გაზრდის მომსახურების ხარისხს, რაც აუცილებლად შეამცირებს ბილეთის ფასს და გამოიწვევს როგორც ზოგადად მგზავრთა ნაკადის, ისე საქართველოში ჩამომსვლელი ტურისტების რაოდენობას.
საქართველოში ჩეხეთის რესპუბლიკის საგანგებო და სრულუფლებიანი ელჩის, ივან იესტრაბის განცხადებით აღნიშნული ხელშეკრულება ხელს შეუწყობს ორ ქვეყანას შორის ურთიერთობების გაღრმავებას და ქართული ავიაკომპანიების ჩეხეთის ბაზარზე, ჩეხური ავიაკომპანიების კი საქართველოს ბაზარზე შემოსვლას და დამკვიდრებას.