დღეს ბელორუს პარლამენტართა ერთდროულად სამი დელეგაცია საქართველოსა და მის სეპარატისტულ რეგიონებში აფხაზეთსა და ე.წ. სამხრეთ ოსეთში გაემგზავრება. ბელორუს პარლამენტართა მიზანია შეისწავლოს საქართველოსა და მის რეგიონებში არსებული ვითარება, რაც თავის მხრივ ბელორუსის პარლამენტში აფხაზეთისა და ე.წ. სამხრეთ ოსეთის დამოუკიდებლობის აღიარების საკითხის მოსალოდნელ განხილვასთანაა დაკავშირებული.
ეს განცხადება საპარლამენტო კომისიის თავმჯდომარემ სერგეი მასკევიჩმა გააკეთა, რომელიც საქართველოში მომავალ ბელორუს პარლამენტართა ჯგუფის დელეგაციას ხელმძღვანელობს. მისი თქმით, ბელორუსი დეპუტატები 2-3 დღის განმავლობაში შეხვდებიან ადგილობრივ მოსახლეებს, სასულიერო პირებს, მეცნიერებსა და პარლამენტარებს. დეპუტატები ასევე მოინახულებენ ქალაქ გორსა და მის რაიონს.
მისივე თქმით ბელორუსი პარლამენტარები ასევე აპირებენ რუს ე.წ. სამშვოდობოთა როლის შესწავლას აფხაზეთსა და ე.წ. სამხრეთ ოსეთში მიმდინარე საბრძოლო მოქმედებებში. ამ საკითხის შესასწავლად ბელორუსი დეპუტატები 26 ნოემბერს რუსეთის დუმას ეწვევიან.
შეგახსენებთ, რომ ბელორუსის პარლამენტში აფხაზეთისა და ე.წ. სამხრეთ ოსეთის დამოუკიდებლობის აღიარების საკითხის შემსწავლელი სამუშაო ჯგუფია შექმნილი.