„წარმოგიდგენიათ, როგორ ვაკუუმში არიან? პატარა ბავშვს რომ ახირება აქვს, გინდა თუ არა, სათამაშო მიყიდეო, ასე უნდათ რიგგარეშე არჩევნები და რა ვქნათ, იქნებ, ახლა მაინც გაიზარდონ", - აცხადებს პარლამენტის სპორტის კომიტეტის თავმჯდომარე მიხეილ ყაველაშვილი.
მისი განცხადებით, საქართველოში იდეალური არჩევნები შეიძლება, რამდენიმე წლის შემდეგ ჩატარდეს, რადგანაც ეს მხოლოდ საარჩევნო ადმინისტრაციაზე დამოკიდებული არ არის.
"რაც შეეხება დარღვევებს, საარჩევნო რეფორმა მომზადდა, ახლაც ეუთო/ოდირის რეკომენდაციებიდან გამომდინარე ინიცირებულია ცვლილებები. საქართველოში იდეალური არჩევნები შეიძლება, რამდენიმე წლის შემდეგ ჩატარდეს. ეს არ არის მხოლოდ საარჩევნო ადმინისტრაციაზე დამოკიდებული, არამედ თითოეულ მოქალაქეზეა დამოკიდებული, მათ შორის შეგნებასა და სხვადასხვა გარემოებაზე. შეფასება გაკეთდა, რომ უკეთესი არჩევნები იყო, ვიდრე მანამდე. ყველა არგუმენტი გამოცლილი აქვს ოპოზიციას და რა ვქნათ, ჩვენი ქვეყნის მოქალაქეები არიან და როგორ მივუთითოთ, რომ ეს ყველაფერი მავნებლობაა საკუთარი ქვეყნის წინაშე. ბოლო შესაძლებლობაა, იქნებ, ევროპული საბჭოს პრეზიდენტის წარმომადგენელთან მაინც იყვნენ ადეკვატურები და საკუთარი ქვეყნის მოყვარულები”, – აცხადებს ყაველაშვილი.
