საქართველოს ჯანდაცვის მინისტრი ეკატერინე ტიკარაძე აცხადებს, რომ მომწოდებელი ძალიან წუხს ვაქცინის მოწოდების პროცესის შეფერხების გამო. ამის შესახებ ტიკარაძემ ტელეკომპანია "იმედისთვის" მიცემულ ინტერვიუში ისაუბრა.
მინისტრის განცხადებით, მომწოდებლები არიან საკმაოდ დიდი ზეწოლის ქვეშ, ვინაიდან ვაქცინის მიწოდება მხოლოდ საქართველოსთვის არ გადადებულა.
ეკატერინე ტიკარაძე კვლავ ირწმუნება, რომ ვაქცინა ქვეყანაში უახლოეს მომავალში შემოვა.
"დღეს, პანდემიის დაწყებიდან ერთი წლის შემდეგ ქვეყნის წინაშე დგას ახალი პრიორიტეტები და მიზნები - ეს არის ვაქცინაცია და ვაქცინაციის გზით პანდემიის დამარცხება. ამ კუთხითაც უნდა ვაღიაროთ, რომ არის ძალიან დიდი გამოწვევა და ამ გამოწვევების წინაშე მხოლოდ საქართველო არ დგას. ეს გლობალური გამოწვევა, ვინაიდან როგორც ვირუსი იყო ახალი, ასევე ვირუსისთვის დამზადებული ვაქცინების უმრავლესობა წარმოადგენს ახალი ტექნოლოგიებით დამზადებულ ვაქცინას, რომლებიც საჭიროებენ სისტემის მნიშვნელოვან გადაწყობას. ზოგადად, ჯანდაცვის სისტემაში დღეს არის ვაქცინების საკმაოდ დიდი დეფიციტი, რის შედეგადაც სამწუხაროდ, საქართველოში ჯერჯერობით ვაქცინაცია არ არის დაწყებული, თუმცა ამ კუთხითაც არის მნიშვნელოვანი ნაბიჯები გადადგმული და გასული წლის ზაფხულის შემდეგ ჩვენ გვაქვს ინტენსიური კომუნიკაცია და მოლაპარაკებები. გაერთიანებული ვართ ყველა შესაძლო პლატფორმაზე, რომლითაც შეიძლება სახელმწიფომ მიიღოს ვაქცინაციის პროცესში მონაწილეობა. ასევე გვაქვს მოლაპარაკება როგორც პარტნიორ სახელმწიფოებთან, ასევე მწარმოებლებთან, რაც უახლოეს მომავალში მოგვცემს საშუალებას, რომ წარმატებით დავიწყოთ ვაქცინაციის პროცესი. ამ მიმართულებითაც აუცილებელად უნდა აღინიშნოს საქართველოს მზაობის კომპონენტი, ვინაიდან COVAX-პლატფორმაზე, როდესაც ჩვენ მივიღეთ თანხმობა ვაქცინის მოწოდებაზე, საქართველომ აჯობა არაერთ ქვეყანას მზაობის კომპონენტით და სწორედ ამიტომ მოგვეცა საშუალება, რომ COVAX-პლატფორმიდან ველოდოთ ვაქცინებს", - განაცხადა ტიკარაძემ.