ქრისტიან-დემოკრატები პარლამენტში საგამოძიებო კომისიის შექმნას ითხოვენ, რომელიც ბოლო წლებში მომხდარი გახმაურებული მკვლელობების ფაქტებს გამოიძიებს. ამის შესახებ განცხადება ფრაქცია ქრისტიან-დემოკრატების თავმჯდომარემ გიორგი ახვლედიანმა დღეს ბიუროს სხდომაზე გააკეთა.
როგორც მან აღნიშნა, ცოტა ხნის წინ ქრისტიან-დემოკრატებს მიმართეს არასამთავრობო ორგანიზაციებმა და პარლამენტში აღნიშნული საკითხის დაყენება სთხოვეს.
შეგახსენებთ, რომ რეგლამენტის თანახმად, საგამოძიებო კომისიის შექმნის საკითხის დაყენება შეუძლია პარლამენტართა 1/3-ს ან ფრაქციას. საკითხი ფრაქცია ქრისტიან-დემოკრატებმა დააყენა, თუმცა როგორც დავით ბაქრაძემ ბიუროს სხდომაზე აღნიშნა, უნდა მოხდეს საკითხის ოფიციალური დარეგისტრირება და შემდეგ სესიაზე იქნება გადაწყვეტილება მიღებული კომისიის შექმნასთან ან არშექმნასთან დაკავშირებით.
ქრისტიან-დემოკრატების მიერ დასახელებულ ფაქტებში ხვდება ყველა ის საქმე, რომელსაც საზოგადოება დღემდე გამოუძიებლად მიჩნევს და სადაც რაიმე ფორმით გარეული არიან ხელისუფლების მაღალჩინოსნები. მათ შორის გირგვლიანის, რობაქიძის, ვაზაგაშვილის და ა.შ. საქმეები.
"ამ საქმეებთან დაკავშირებით საზოგადოებაში არსებობს ბევრი პასუხგაუცემელი კითხვა და საჭიროა ამ კითხვებს პარლამენტმა მაინც გასცეს პასუხი", - აცხადებს ახვლედიანი.
