ოკუპირებული ტერიტორიებიდან იძულებით გადაადგილებილ პირთა, განსახლებისა და ლტოლვილთა სამინისტრო ნანა ფიფიას შესახებ, რომელმაც დღეს სამინისტროს ეზოში თვითმკვლელობა სცადა, განცხადებას ავრცელებს.
სუბელიანის უწყების განცხადებაში ნათქვამია, რომ ნანა ფიფია, 2000 წლამდე ცხოვრობდა ზუგდიდში. შემდეგ კი საცხოვრებლად თბილისში ნათესავთან გადავიდა. სამინისტრომ ფიფიას საცხოვრებელი ფართი ისევ რეგიონში შესთავაზა, თუმცა, მან აღნიშნული შეთავაზება არ მიიღო.
"სამწუხაროდ, თბილისში ყველა დევნილის დაკმაყოფილება და ბინების დარიგება ფიზიკურად შეუძლებელია. შესაბამისად, ამ ეტაპზე, სამინისტრო იმ დევნილებს, რომელთაც სახოვრებელი ფართები არ გააჩნიათ, სთავაზობს სრულად რეაბილიტურებულ საცხოვრებელ ფართებს სხვადასხვა რეგიონებში, საკუთრებაში", - ნათქვამია ოკუპირებული ტერიტორიებიდან იძულებით გადაადგილებილ პირთა, განსახლებისა და ლტოლვილთა სამინისტროს განცხადებაში.
შეგახსენებთ, რომ დღეს, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ეზოში, აფხაზეთიდან დევნილი 40 წლის ნანა ფიფია თავის დაწვას შეეცადა.
დაშავებული დამწვრობის ცენტრში გადაიყვანეს. მას სავარაუდოდ სხეულის 30%-ზე მეტი აქვს დამწვარი და სხეულის მესამე ხარისხის დამწვრობა აქვს მიღებული. ფიფიამ ეზოში ნავთი გადაისხა და ცეცხლი წაიკიდა. იგი ამჟამად რეანიმაციულ განყოფილებაში მოთავსებული და შოკურ მდგომარეობაში იმყოფება.
დევნილები სამინისტროს თბილისის ნებისმიერ უბანში საცხოვრებელი ფართის გამოყოფას სთხოვენ. სამინისტრო მათ სახლებს რეგიონებში სთავაზობს, რასაც დევნილები აპროტესტებენ.
