საქართველოში კორონავირუსის ახალი შტამი დადასტურდა, - ამის შესახებ ჟურნალისტებს დაავადებათა კონტროლის ეროვნული ცენტრი ხელმძღვანელის მოადგილემ პაატა იმნაძემ განუცხადა.
მისი თქმით, ინფიცირებული 50 წელს გადაცილებული პაციენტია, რომელიც თავს კარგად გრძნობს და იზოლაციაშია.
პაატა იმნაძის თქმით, ახალი შტამით ინფიცირებული პირი ბრიტანეთში არ ყოფილა, თუმცა რომელ ქვეყანაში მოგზაურობის ისტორია აქვს მას, არ აკონკრეტებს.
"კორონავირუსის ახალი შტამით ინფიცირებული უკვე პრაქტიკულად გამოჯანმრთელებულია. ახალი შტამი არ გამოირჩევა ახალი კორონავირუსისგან სიმძიმის ან ლეტალობის მაჩვენებლით, თუმცა არსებული შტამისგან განასხვავებს მაღალი გადამდებობა", - თქვა იმნაძემ.
კორონავირუსის ახალი შტამი, რომელიც პირველად დიდ ბრიტანეთში აღმოაჩინეს, ამ დროის მონაცემებით, საქართველოს გარდა კიდევ 37 სახელმწიფოში, ასევე ჰონგ კონგსა და ტაივანში დაფიქსირდა.
ექსპერტების მტკიცებით, მიუხედავად იმისა, რომ ახალ შტამს უფრო მაღალი გადამდებობა აქვს ვიდრე Covid-19 სხვა შტამებს, არ არსებობს მტკიცებულება იმისა, რომ ის უფრო მძიმე დაავადებას იწვევს, ან უფრო მაღალი ლეტალობის მაჩვენებლით გამოირჩევა.
ჯანმრთელობის მსოფლიო ორგანიზაციის განცხადებით, უახლოეს დღეებშ ეცოდინებათ, თუ როგორ რეაგირებს კორონავირუსის ახალი შტამი უკვე დამტკიცებულ ვაქცინებზე.
ახალი შტამი დადასტურდა შემდეგ ქვეყნებში - გაერთიანებული სამეფო, ავსტრალია, ბელგია, ბრაზილია, კანადა, ჩილე, ჩინეთი, დანია, ფინეთი, საფრანგეთი, გერმანია, ისლანდია, ინდოეთი, ირლანდია, ისრაელი, იტალია, იამაიკა, იაპონია, იორდანია, ლიბანი, მალტა, ლუქსემბურგი, ნიდერლანდები, ახალი ზელანდია, ნორვეგია, პაკისტანი, პორტუგალია, არაბთა გაერთიანებული საემიროები, სინგაპური, სამხრეთ კორეა, საქართველო, ესპანეთი, შვედეთი, შვეიცარია, ტაილანდი, თურქეთი, შეერთებული შტატები (ფლორიდის, კალიფორნიის და კოლორადოს შემთხვევები) და ვიეტნამი.
