ლაგოდეხის რაიონში მცხოვრები ეკომიგრანტები ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა - კობა სუბელიანმა და სამინისტროს თანამშრომლებმა მოინახულეს. მინისტრმა სოფელ ფონაში სტიქიით დაზარალებულებისთვის შეძენილი სახლები დაათვალიერა და მათ საცხოვრებელ პირობებს გაეცნო.
სოფელ ფონაში აჭარის რეგიონიდან (ხულო, შუახევი) სტიქიის შედეგად გადასახლებული ოჯახები ცხოვრობენ. მათთვის საცხოვრებელი სახლები ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ შეიძინა. ეს გახლავთ ორსართულიანი სახლები, როგორც საკარმიდამო ნაკვეთებით, ისე სახნავ-სათესი მიწებით. ლაგოდეხის რაიონში სულ შეძენილია 51 სახლი, სოფელ ფონაში კი 13 სახლი.
დაზარალებული ოჯახები ახალმოსახლებით, განსაკუთრებით კი უხვმოსავლიანი მიწებით კმაყოფილები არიან. როგორც თავად ამბობენ, კარგი მოსავალი მოჰყავთ და სახელმწიფოს დახმარებებზეც არ არიან დამოკიდებულნი. გარდა ამისა, ლაგოდეხის რაიონი სტიქიის მხრივ ნაკლებრისკიანი რაიონია.
ამჯერად მინისტრი კობა სუბელიანი ბერიძეების ოჯახს ესტუმრა, დაათვალიერა მათი სახლ-კარი. მინისტრმა აღნიშნა, რომ დაცარიელებული სოფლები ივსება და ეკონომიკურად ძლიერდება: „რეგიონებში 3 ათასამდე ოჯახისათვის შევიძინეთ 2 სართულიანი სახლები, რომლებსაც ახლავთ მიწის ნაკვეთები, მაგალითად ბერიძეების ოჯახმა 2 ტონა კიტრის მოსავალი აიღო და ისინი არ არიან სხვის დახმარებაზე დამიკიდებულები. დაცარიელებული სოფლები ივსება და გვაქვს ეკონომიკურად ძლიერი ოჯახები. ეს პროცესი არის შეუქცევადი".
მომავალ კვირას მინისტრი კობა სუბელიანი სხვა რაიონებშიც ჩავა და დაზარალებულებს ახალმოსახლეობას მიულოცავს.
