პარლამენტმა დღეს დაჩქარებული წესით მესამე მოსმენით დაამტკიცა რეგლამენტში ცვლილებების შეტანის პროექტი. რეგლამენტში ცვლილება ეხება პარალმენტში დროებითი კომისიის ფუნქციონირების საკითხს. შეტანილი ცვლილება ზვიად გამსახურდიას გარდაცვალების ფაქტის შემსწავლელ კომისიას უკვე საშუალებას აძლევს, მუშაობა უვადოდ გააგრძელოს.
რეგლამენტის მოქმედი რედაქციით, კომისიის ვადა, კომისიის თავმჯდომარის მოთხოვნით, შეიძლება გაგრძელდეს ორჯერ 3-3 თვით. ვადის მესამედ გავრცელების მოთხოვნის უფლება აქვს პარალმენტის თავმჯდომარეს, რისთვისაც საჭიროა პარლამენტის დადგენილება. ცვლილების თანახმად, პარლამენტის თავმჯდომარეს კომისიისთვის მუშაობის გაგრძელების მოთხოვნის რაოდენობრივი შეზღუდვა ეხსნება. შესაბამისად, პარალმენტის თავმდჯომარეს უფლება ექნება, პარლამენტს აღნიშნული ინიციატივით განუსაზღვრელი რაოდენობით მიმართოს.
ზვიად გამსახურდიას გარდაცვალების ფაქტის შემსწავლელ კომისიას, რომელსაც კონსტანტინე გამსახურდია ხელმძღვანელობს, უფლებამოსილება რამდენიმე დღეში ეწურება. პარალმენტმა რეგლამენტში ცვლილება დაჩქარებული წესით განიხილა და მიიღო.
