საქართველოს ეროვნულ ბანკს, კრედიტინფო საქართველოსა და კომერციულ ბანკებს შორის ურთიერთშეთანხმების მემორანდუმის მიხედვით, სუბიექტს უფლება ექნება კრედიტინფო საქართველოს ოფისში პირადობის დამადასტურებელი მოწმობის წარდგენის შემთხვევაში მიიღოს მონაცემთა ბაზაში თავისი სტატუსის შესახებ არსებული მონაცემები.
საკრედიტო ინფორმაციის მონაცემთა ბაზაში არასრული, არაზუსტი, არასწორი ან კანონის დარღვევით გადმოცემული ინფორმაციის აღმოჩენის შემთხვევაში საკრედიტო ისტორიის სუბიექტს უფლება აქვს მიმართოს სს "კრედიტინფო საქართველოს" ან მის შესაბამის კლიენტს (ბანკს, მიკროსაფინანსო ორგანიზაციასა და ა.შ.), რომლის მიერაც მოხდა აღნიშნული ინფორმაციის მონაცემთა ბაზაში გადაცემა.
მემორანდუმის თანახმად, საკრედიტო ისტორიის სუბიექტის განცხადების საფუძველზე სს "კრედიტინფო საქართველო" ან შესაბამისი კლიენტები ვალდებულნი არიან გადაამოწმონ ინფორმაცია და მიიღონ სს "კრედიტინფო საქართველოს" პროცედურებითა და კანონმდებლობით გათვალისწინებული ზომები საკრედიტო ისტორიის სუბიექტის უფლებების დაცვისა და მონაცემთა ბაზაში შესაბამისი ცვლილების შეტანის მიზნით.
შეგახსენებთ, რომ მემორანდუმი დღეს გაფორმდა. სულ სს "კრედიტინფო საქართველოს" მონაცემთა ბაზაში განთავსებულ ჩანაწერთა რაოდენობამ, ანუ ინფორმაციამ მიმდინარე და დაფარული სესხების შესახებ, ასევე, გადაგადაცილებული და გადაუხდელი სესხების შესახებ 2 მილიონს გადააჭარბა.