დღეს, 26 ოქტომბერს, 12:00 საათზე, "ელიტ ელექტრონიქსის" სათავო ოფისში "ელიტ ელექტრონიქსსა" და "თბილისი ცენტრალს" შორის მემორანდუმი გაფორმდება.
"ელიტ ელექტრონიქსი" მაღაზიათა ქსელს აფართოებს. 1-ლი დეკემბრიდან კომპანია მომხმარებელს კიდევ ერთ, განსხვავებული ფორმატის მაღაზიას "თბილისი ცენტრალის" კომპლექსში შესთავაზებს.
"ელიტ ელექტრონიქსის" მენეჯმენტის ინფორმაციით, ახალი ობიექტი აქამდე საქართველოში არსებული ტექნიკის მაღაზიებისაგან სრულიად განსხვავებული სტილით იქნება წარმოდგენილი და მომხმარებელს ყველაზე ფართო ასორტიმენტს შესთავაზებს.
"თბილისი ცენტრალში მაღაზია მომხმარებლებს 1-ლი დეკემბრიდან მოემსახურება და მათ სხვადასხვა ბრენდების ტექნიკის ფართო ასორტიმენტს წარმოუდგენს. ობიქტის გახსნაში ნახევარი მილიონი ლარი ინვესტიცია დაბანდდება. მაღაზია 700 კვ.მ ფართობზე იქნება განლაგებული და მომხმარებელს 2000-ზე მეტი დასახელების ტექნიკას შესთავაზებს. ეს არის ვაჭრობის ევროპული მოდელი, რომელიც მყიდველს უმარტივებს დათვალიერებას, ხოლო შეძენის პროცესს უფრო მოსახერხებელს ხდის", - აცხადებს "ელიტ ელექტრონიქსის" დირექტორის პირველი მოადგილე დავით კენჭაძე.
კომპანიის მენეჯმენტის ინფორმაციით, აღნიშნული მაღაზიის გარდა, 2010 წლის ბოლომდე "ელიტ ელექტრონიქსის" ქსელს კიდევ 4 ახალი მაღაზია შეემატება. ცვლილებები იგეგმება საგარანტიო პირობებთან დაკავშირებითაც. აღნიშნულთან დაკავშირებით მენეჯმენტი ითვალისწინებს საგანგებოდ მოწვეული და ამავდროულად კომპანიის სამეთვალყურეო საბჭოს წევრის პიტერ სებასტიანი რეკომენდაციებს, რომელიც "ელიტ ელექტრონიქსს" ასევე ახალი პარტნიორების მოძიებაში ეხმარება.
სს "ელიტ ელექტრონიქსი" საქართველოს სამომხმარებლო ბაზარზე 1996 წლიდან ფუნქციონირებს და სადღეოსოდ 21 მაღაზიას მოიცავს.
