რუსეთის საგარეო საქმეთა სამინისტროს განცხადებით, რუსეთმა სარკისებურად უპასუხა დიდი ბრიტანეთის სანქციებს და პერსონალური სანქციები დაუწესა ბრიტანეთის 25 მოქალაქეს.
სანქცირებულ მოქალაქეებს რუსეთის ტერიტორიაზე შესვლა აეკრძალებათ.
"ბრიტანეთის ხელისუფლების არაკეთილსინდისიერი ქმედებების საპასუხოდ რუსულმა მხარემ გადაწყვიტა პერსონალური სანქციების დაწესება ბრიტანეთის 25 წარმომადგენლის წინააღმდეგ, რომლებსაც ეკრძალებათ რუსეთის ფედერაციის ტერიტორიაზე შესვლა", - განაცხადა რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ.
ზახაროვას განცხადებით, ბრიტანული მხარის ქმედებას სხვა არაფერი შეიძლება ეწოდოს, გარდა რუსეთის შიდა საქმეებში ჩარევისა და მართლმსაჯულების სისტემაზე ზეწოლისა.
"ჩვენ კიდევ ერთხელ მოვუწოდებთ ბრიტანეთის ხელისუფლებას, უარი თქვას გაუმართლებელიკონფრონტაციულ ქმედებებზე ჩვენი ქვეყნის წინააღმდეგ. ნებისმიერი არამეგობრული ნაბიჯი არ დარჩება გარდაუვალი პროპორციული რეაგირების გარეშე", - დასძინა ზახაროვამ.
შეგახსენებთ, 2020 წლის ივლისში, დიდმა ბრიტანეთმა პერსონალური სანქციები დაუწესა რუსეთის ფედერაციის იმ 25 მოქალაქეს, რომლებიც დაკავშირებულნი არიან მაგნიტსკის საქმესთან.
სანქცირებულ პირთა სიაში მოხვდნენ რუსეთის საგამოძიებო კომიტეტის თავმჯდომარე, ალექსანდრე ბასტრიკინი, შინაგან საქმეთა სამინისტროს თანამშრომლები, წინასწარი დაკავების იზოლატორის თანამშრომლები და ექიმები.
2018 წელს, ბრიტანეთის ქალაქ სოლსბერიში სერგეი სკრიპალისა და მისი ქალიშვილის მოწამვლის შემდეგ, ბრიტანეთის პარლამენტმა მიიღო მაგნიტსკის სიის შესწორება, რომელიც აძლევს საშუალებას, პესრონალური სანქციები დააკისროს უცხოელებს, რომლებიც ეჭვმიტანილნი არიან კორუფციასა და ადამიანის უფლებების დარღვევაში.
მაგნიტსკის აქტი
შეერთებულმა შტატებმა 2012 წელს მიიღო "მაგნიტსკის აქტი", რომელიც ითვალისწინებს სანქციებს ადამიანის უფლებების დარღვევაში ბრალდებული რუსეთის მოქალაქეების წინააღმდეგ.
"მაგნიტსკის აქტი", იურისტ სერგეი მაგნიტსკის სახელს ატარებს, რომელიც 2009 წელს მოსკოვის ერთ-ერთ იზოლატორში გარდაიცვალა.
მაგნიტსკი დააკავეს, როცა მუშაობდა რუსეთის სახელმწიფო ბიუჯეტიდან სახსრების მითვისებასთან დაკავშირებული მსხვილმასშტაბიანი კორუფციული სქემის გამოსააშკარავებლად.
2016 წელს შეერთებული შტატების კონგრესმა მიიღო კიდევ ერთი კანონი, რომლითაც პრეზიდენტს ეძლევა უფლებამოსილება, განაახლოს იმ უცხოელთა სია, რომლებიც დამნაშავეები არიან კორუფციისა და ადამიანის უფლებების დარღვევაში.
მსგავსი სამართლებრივი აქტები მიიღეს ასევე კანადაში, ესტონეთში, ლატვიაში, ლიეტუვასა და გაერთიანებული სამეფოში.