საქართველოს ხელისუფლება "ოსმანურ რეფორმებს" ატარებს, აცხადებს სომეხი ისტორიკოსი სამველ კარაპეტიანი და საქართველოს სომხური მიწების მიტაცებაში, საქართველოში მაცხოვრებელი სომხების განდევნასა და გაქართველებაში სდებს ბრალს.
"საქართველოს ხელისუფლება "ოსმანურ რეფორმებს" ატარებს, რომელთა განხორციელების დროსაც ადამიანები უფრო იტანჯებიან. მანამ ვიდრე საქართველოს ხელისუფლება მოსაზღვრე სოფლებს მიადგებოდა, ჯერ კიდევ ზვიად გამსახურდიას მმართველობის დროიდან მოყოლებული მათ ძალიან ბევრი რამ გააკეთეს ამ მიმართულებით. სწორედ მაშინ ამოიღეს მათ მიზანში საქართველოში მაცხოვრებელი სომხები და დაისახეს მიზნად ისინი ნაციონალური ფესვებისათვის მოეწყვიტათ", _ აცხადებს სომეხი ისტორიკოსი სომხური გამოცემა "აიოც აშხარისათვის" მიცემულ ინტერვიუში.
მისივე თქმით, საქართველოს შემდეგი პრეზიდენტები კი იგივე პოლიტიკას ახორციელებდნენ. "საქართველოს ეთნოგრაფიის ინსტიტუტი დღემდე აწარმოებს საქართველოში მაცხოვრებელი სომხების გაქართველებას. ისინი "ეძებენ და პოულობენ" მას ქართულ გვარებს იმისათვის, რომ ნამდვილ გვარზე ათქმევინონ უარი", _ აცხადებს კარაპეტიანი და საუბარს იმ ტერიტორიებზე აგრძელებს, რომლებიც "სტალინის გადახაზვის შემდეგ საქართველოს შემადგენლობაში" აღმოჩნდნენ.
"უკვე 20 წელიწადია მე ვწერ სტატიებს ჩვენს ეკლესია ხუჩაპზე, რომელიც საქართველოს საზღვრიდან 300 მეტრში სომხეთის ტერიტორიაზე იმყოფება. სწორედ იმ საზღვრიდან, რომელიც 1930 წელს გახაზეს. ამ ახალ გახაზვამდე სომხური სოფლები - ახკერპი და ჩანახჩი საბჭოთა სომხეთის ტერიტორიაზე იყო, სტალინის გადახაზვის შემდეგ კი ისინი საქართველოს მარნეულის რაიონის შემადგენლობაში აღმოჩნდნენ.
საზღვარი ხელოვნურად გადახაზეს და სომხეთის კუთვნილი მიწები საქართველოს მისცეს. შედეგად სომხეთის ტერიტორიაზე არსებული სოფლები სასოფლო-სამეურნეო მიწების გარეშე დარჩნენ. მიწის გარეშე კი სოფელი არაფერია. დღეს ქართველი მესაზღვრეები სომეხ გლეხებს თავის საკუთარ მიწაზე გადასვლისათვის აკავებენ და ციხეში უშვებენ.
მეტიც, საქართველოს თეთრიწყაროს რაიონში სოფლებში სამგრეთში და დურნუკში შექმნეს კვარტლები და იქ აჭარლები და სვანები ჩაასახლეს, რომლებმაც ადგილობრივი სომხური მოსახლეობის ცხოვრება იქ აუტანელი გახადა, შედეგად მათ ემიგრირება დაიწყეს", _ აცხადებს კარაპეტიანი და დასძენს, რომ - "ერთი რამ ცხადია - თბილისში მაცხოვრებელი სომხები, რომლებმაც ქართული ენა იციან უფრო ერთგულად ემსახურებიან ქართველებს. ჩემი აზრით, საქართველოში ქართულის კარგად ცოდნა მიგვიყვანს იქამდე, რომ სომეხს სომხური არ ეცოდინება კარგად.
ქართველები ყველა ფრონტზე მუშაობენ - უკვე ის სკოლები, რომლებიც სომხური კულტურის სახელებს ატარებდნენ, თავის სახელებს კარგავენ. ახალქალაქის სკოლა კი ილია ჭავჭავაძის სახელობისაა", _ აცხადებს სომეხი ისტორიკოსი.