სურსათის უვნებლობის, ვეტერინარიისა და მცენარეთა დაცვის ეროვნული სამსახური კახეთის რეგიონში თურქულის მასობრივად გავრცელებას მალავს. ამ საკითხზე სამსახურის სპეციალისტები ოფიციალურ კომენტარს ამ დრომდე არ აკეთებენ. კახეთის საინფორმაციო ცენტრის ინფორმაციით, სხვადასხვა სოფლებში მსხვილფეხა რქოსანი პირუტყვის დავარდნის შემთხვევები ყოველდღიურად იზრდება.
თურქული მასობრივად არის გავრცელებული გურჯაანის რაიონის სოფელ ჩუმლაყში. სოფლის მაცხოვრებლების თქმით, საქონლის აცრის აუცილებლობის შესახებ ვეტერინარიის სამსახურს დაავადების გავრცელებამდე მიმართეს, მაგრამ უშედეგოდ.
„მეც ვნახე რომ ძროხები დავარდნენ, მაგრამ ვერაფერს გეტყვით", - აღნიშნა ვეტერინარიის სამსახურის გურჯაანის სამმართველოს უფროსმა ავთანდილ ზარდიაშვილმა.
კახეთის საინფორმაციო ცენტრი ამ საკითხზე კომენტარისთვის სურსათის უვნებლობის, ვეტერინარიისა და მცენარეთა დაცვის ეროვნული სამსახურის პრესსამსახურის უფროსს ვერიკო გულუას და სოფლის მეურნეობის სამინისტროს პრესსამსახურის უფროსს გიორგი ჩადუნელს დაუკავშირდა, რომლებმაც კომენტარი არ გააკეთეს.
სპეციალისტების განცხადებით, დაავადების გავრცელებასთან დაკავშირებით რეგიონში იმდენად მძიმე მდგომარეობაა, რომ სასწრაფოდ კარანტინია გამოსაცხადებელი.
