მესტიის აეროპორტის მშენებლობა საქართველოს პრეზიდენტმა ეკონომიკისა და მდგრადი განვითარების და ინფრასტრუქტურისა და რეგიონალური განვითარების სამინისტროების ჯგუფის ერთობლივ შეხვედრაზე პირდაპირ ეთერში ნახა.
როგორც ეკონომიკისა და მდგრადი განვითარების მინისტრმა ვერა ქობალიამ აღნიშნა, აეროპორტის შენობის მშენებლობის საფუძველი უკვე ჩაყრილია. ასევე დაწყებულია ასაფრენი ზოლის მშენებლობა.
პრეზიდენტი დაინტერესდა, მიმდინარეობს თუ არა მოლაპარაკებები კომპანიებთან, რომლებიც შემოიყვანენ თვითმფრინავებს და ეს თვითმფრინავები მესტიაში იფრენენ.
პრეზიდენტის თქმით, წელს მესტიაში პირველი ტრასა დაიგება. მომავალ წელს კი, მაისიდან, ჰადიშისა და უშგულის ხეობებში ტრასის გაჭრა დაიწყება და ამას დიდი სათხილამურო პოტენციალი აქვს.
"ბი-ბი-სი-ზე ვნახე სიუჟეტი ,სადაც ნათქვამია, რომ მესტია ბევრად სჯობია ალპებს. მესტიაში სათხილამურო ტრასები იწყება პირდაპირ მესტიიდან და სრულდება უშგულით, რომელიც არის საოცრება მსოფლიოში", - აღნიშნა პრეზიდენტმა.
პრეზიდენტის თქმით, მესტიას ექნება ოლიმპიური ტრასა, რომელიც უკვე სერთიფიცირებულია ხოლო ჰადიშში ყველა ტრასის ქვემოთ იქნება სასტუმრო. მესტიაში გაიხსნება ტურიზმის საინფორმაციო ცენტრიც, სადაც მოხდება რეალიზაცია სასტუმროების მომსახურებისა და ტურისტული სერვისი.
