გარემოს დაცვის სამინისტროსა და გერმანიის ტექნიკური თანამშრომლობის საზოგადოებას (GTZ) შორის თანამშრომლობის ხელშეკრულება გაფორმდა.
„გერმანიის ტექნიკური თანამშრომლობის საზოგადოება ჩვენთვის ძალიან მნიშვნელოვანი პარტნიორია. ზოგადად დონორებთან ურთიერთობას უდიდესი მნიშვნელობა აქვს. დღევანდელი ხელმოწერით ეს ხელშეკრულება უზრუნველყოფს სატყეო სააგენტოსთვის ახალ აღჭურვილობას, რომელსაც გამოიყენებენ უკანონო ჭრების წინააღმდეგ. თანამშრომლობა ხელს შეუწყობს სატყეო სააგენტოს გაძლიერებას" - განაცხადა გოგა ხაჩიძემ.
ხელშეკრულება 1 წლიანია და მიზნად ისახავს საქართველოში ტყის რესურსების მართვის გაუმჯობესებას, ტყის მონაცემთა მართვის ელექტრონული სისტემის შექმნას და ხეების მარკირების სისტემის გაუმჯობესებას. ეს ხელს შეუწყობს ხე-ტყის უკანონო ჭრის შემცირებას.
„გარემოს დაცვის სამინისტროსთან რამდენიმეწლიანი თანამშრომლობის შემდეგ მივაღწიეთ საქართველოში სატყეო სექტორის განვითარების გადამწყვეტ მომენტს. მას შემდეგ, რაც სატყეო დეპარტამენტი სააგენტოდ ჩამოყალიბდა, უფრო მეტი შესაძლებლობაა, რომ გავაღრმავოთ თანამშრომლობა. ეს არის ტყის მდგრადი მართვის დასაწყისი, რაც ხელს შეუწყობს ეკონომიკური და ეკოლოგიური მიზნების მიღწევას. ვიმედოვნებ, რომ მომავალ წელს ჩვენი თანამშრომლობა კიდევ უფრო წარმატებული იქნება"-განაცხადა გერმანიის ტექნიკური თანამშრომლობის პროგრამების ხელმძღვანელმა ფრენკ ფლაშემ.
თანამშრომლობის ფარგლებში შემუშავდება სატყეო ტერიტორიებზე ველური მცენარეების შეგროვების და ნადირობის წესები. ჩამოყალიბდება სატყეო სააგენტოსთვის ფინანსური მდგრადობის კონცეფცია.
