საქართველოს პრემიერ-მინისტრ გიორგი გახარიასთან ბრწყინვალე შეხვედრა გვქონდა ევროკავშირ-საქართველოს ორმხრივი ურთიერთობების განვითარების და აღმოსავლეთ პარტნიორობის მომავლის შესახებ, - ამის შესახებ ევროპული სამეზობლო პოლიტიკისა და გაფართოების საკითხებში ევროკომისარი ოლივერ ვარჰეი სოციალურ ქსელ „ტვიტერში“ წერს.
ევროკომისარი საქართველოს პრემიერ-მინისტრთან ერთად ხელმოწერილ შეთანხმებებზეც საუბრობს, რომელიც ევროკავშირის მხრიდან საქართველოსთვის ჯამში 129 მილიონი ევროს დაფინანსების გამოყოფას გულისხმობს.
"ვთანხმდებით, რომ მნიშვნელოვანია სატრანსპორტო და საკომუნიკაციო კავშირების, ეკონომიკის აღდგენისა და განვითარების გაძლიერება. საქართველოს პრემიერ-მინისტრ გიორგი გახარიასთან ერთად სიამოვნებით მოვაწერეთ ხელი დაფინანსების 2 შეთანხმებას. აღნიშნულის ფარგლებში ევროკავშირი საქართველოს 129 მილიონ ევროს გამოუყოფს, რაც ქვეყანას ახალი კორონავირუსის ეპიდაფეთქების და ეკონომიკაზე მისი გავლენის დაძლევაში დაეხმარება", - წერს ევროკომისარი ვარჰეი "ტვიტერში".