პოლიციასა და ლილოს ბაზრობის მოვაჭრეების დაპირისპირების დროს სამართალდამცვლებმა "ეროვნული ფორუმის" წევრი ზაზა ჩაკვეტაძე დააკავეს.
როგორც "ჯი-ეიჩ-ენს" პარტიის პრესსამსახურში განუცხადეს, ამ წუთებში "ეროვნული ფორუმის" ლიდერები კახაბერ შარტავა და გუბაზ სანიკიძე ლილოს პოლიციის განყოფილებასთან იმყოფებიან და პარტიის წევრის დაუყოვნებელ გათავისუფლებას ითხოვენ.
"დღეს ლილოს ბაზრობაზე რამდენიმე ობიექტი დალუქეს. ამის გასარკვევად პარტიის ლიდერები ბაზრობაზე გაემგზავრნენ. მათ გზა პოლიციამ გადაუკეტა, რასაც შეხლა-შემოხლა მოჰყვა. სწორედ ამ დროს სამართალდამცავებმა ჩვენი პარტიის წევრი ზაზა ჩაკვეტაძე დააკავეს, თუმცა ლილოს პოლიციის განყოფილებაში აცხადებენ, რომ მათთან არ იმყოფება", - აცხადებენ პარტიაში.
შეგახსენებთ, რომ დღეს ლილოს ბაზრობაზე რამდენიმე ობიექტი დალუქეს, რასაც მოვაჭრეების გაფიცვა მოჰყვა. ვრცელდება ინფორმაცია, რომ რამდენიმე მოვაჭრე დაკავებულია.
