საქართველოს ეკონომიკისა და მდგრადი განვითარების სამინისტრო და "ეიჩ ეს ბი სი" ბანკი ქართული ორგანიზაციებისთვის საერთაშორისო ვაჭრობის აკადემიის მეორე სემინარს ატარებენ.
სპეციალურად ამ დღისთვის საქართველოში ჩამოდის ეიჩ ეს ბი სი ბანკის ევროპის რეგიონის საერთაშორისო ვაჭრობის სტრუქტურული დაფინანსების გაყიდვების ხელმძღვანელი ფრედერიკ ვილსბო. ვილსკო, ეიჩ ეს ბი სი-ს ადგილობრივ ექსპერტებსა და ეკონომიკისა და მდგრადი განვითარების სამინისტროს წარმომადგენლებთან ერთად, ისაუბრებს საერთაშორისო ვაჭრობის პროცესის, მისი დაფინანსების, მასთან დაკავშირებული რისკებისა და მათი შემცირების შესაძლებლობებზე.
საერთაშორისო ვაჭრობის აკადემიის პროექტი ეკუთვნის ეიჩ ეს ბი სი ბანკს. იგი უკვე წარმატებულად ხორციელდება რამდენიმე ქვეყანაში, მათ შორის დიდ ბრიტანეთსა და საფრანგეთში. თითოეულ ქვეყანაში აკადემია მორგებულია კონკრეტული ბაზრის საჭიროებებზე. საქართველოში ის ფოკუსირებულია საერთაშორისო ვაჭრობის პროდუქტებზე, სავალუტო ბაზრებზე და მათთან დაკავშირებულ კანონმდებლობაზე.
სემინარი ხვალ, 21 ოქტომბერს, დილის 10 საათიდან, სასტუმრო "შერატონ მეტეხი პალასში" გაიმართება.