ჯანდაცვის სფეროს დასაფინანსებლად თი-ბი-სი ბანკს ამერიკის მთავრობამ 20 მილიონი აშშ დოლარის ოდენობის სასესხო პორტფელი გამოუყო. დღეს საერთაშორისო განვითარების საგენტომ (USAID), როგორც აშშ-ის მთავრობის წარმომადგენელმა მხარემ, თიბისი ბანკთან 10 მილიონი აშშ დოლარის სასესხო პორტფელის საგარანტიო ხელშეკრულება გააფორმა.
თიბისი ბანკის მიერ გასაცემი 20 მილიონიანი სესხი საქართველოში საავადმყოფოების მშენებლობის, რემონტისა და აღჭურვის დაფინანსებას მოხმარდება და საშუალებას მისცემს ინვესტორებსა და სხვა შესაძლო მსესხებლებს, საქართველოში ააშენონ ახალი, ან გაარემონტონ ძველი საავადმყოფოები, ასევე შეიძინონ მნიშვნელოვანი სამედიცინო აპარატურა. პროგრამის მიზანია ჯანდაცვის სფეროს განვითარების ხელშეწყობა და საქართველოს მოსახლეობისთვის თანამედროვე, მაღალხარისხიანი სამედიცინო მომსახურების უზრუნველყოფა.
თიბისი ბანკი, ერთადერთი ბანკია საქართველოში, რომელიც ჯანდაცვის სფეროს დასაფინასებლად სესხებს USAID-ის გარანტიით გასცემს. გარანტია გაიცემა ქართველი ხალხისთვის ამერიკის მთავრობის მიერ კონფლიქტის შემდეგ დაპირებული ერთი მილიარდი დოლარის ოდენობის დახმარების ფარგლებში.
გარანტიით დაფარული სესხის მაქსიმალური ოდენობა 4 მილიონი აშშ დოლარია. სესხის გაცემისას პრიორიტეტი მიენიჭებათ თბილისის გარეთ მდებარე საავადმყოფოებსა და კლინიკებს.
