"ქართული პარტიის" ერთ-ერთმა ლიდერმა ლევან გაჩეჩილაძემ ახალი პარტიის შექმნის მოტივებსა და მიზნებზე ისაუბრა. მისი თქმით, იგი კვლავ აგრძელებს სააკაშვილის რეჟიმის წინააღმდეგ ბრძოლას, რომელიც რამდენიმე წლის წინ დაიწყო.
გაჩეჩილაძის თქმით, საქართველოში დღეისათვის არსებული ვითარება მოითხოვდა შექმნილიყო ცენტრისტული, დისციპლინირებული ძალა, რომელიც ხელისუფლებას რეალურ წინააღმდეგობას გაუწევდა. მისივე განმარტებით, პარტია მზად არის აიღოს პოლიტიკური პასუხისმგებლობა და გააგრძელოს ხელისუფლების წინააღმდეგ ბრძოლა.
"ჩვენ ყველამ ერთად ძალიან ბევრი გამოვიარეთ. მე პირადად ყველაფერი გავაკეთე და სასწორზეც ბევრი რამ დავდე. ჩვენ ხელისუფლებასთან ბრძოლა ვცადეთ არჩევნების საშუალებითაც, გამოვიყენეთ საპროტესტო აქციებიც, თუმცა ამ ხელისუფლებას ჭკუა მაინც ვერ ვასწავლეთ", - განაცხადა გაჩეჩილაძემ და ყველა ოპოზიციურ პარტიას, ვინც მათ იდეებსა და პრიორიტეტებს გაიზიარებს, ერთად ბრძოლისაკენ მოუწოდა.
გაჩეჩილაძეს მიაჩნია, რომ ოპოზიცია ხელისუფლების თამაშის წესებით ბრძოლით წარმატებას ვერ მიაღწევს.
"ჩვენ მივაღწით გამარჯვებებს, როდესაც სააკაშვილი გადავაყენეთ და ვადამდელი არჩევნები დავანიშნინეთ, მერის პირდაპირი არჩევნები დავანიშნინეთ. ხელისუფლების წინააღმდეგ ბრძოლა უნდა გაგრძელდეს და წარმატებით დასრულდეს", - აღნიშნა გაჩეჩილაძემ.
