"სასამართლოდან მოგვივიდა ინფორმაცია, რომ დაკავებულ მეწარმეებს ხელისუფლება 5-იდან 10 ათასამდე ლარის ოდენობის საპროცესო შეთანხმებას სთავაზობს", - განაცხადა "დემოკრატიული მოძრაობა - ერთიანი საქართველოს" ერთ-ერთმა წევრმა თემურ მურღულიამ.
როგორც მან პარტიის ოფისში გამართულ ბრიფინგზე განმარტა, მეწარმეების დაჭერა საბიუჯეტო რესურსის შემცირებამ გამოიწვია.
"დაკავებული ინდმეწარმეები შრომით ინახავენ ოჯახებს. ხელისუფლებამ კი დაიჭირა იმისთვის, რომ ბიუჯეტი შეევსო. საქართველოს საბიუჯეტო რესურსი მცირდება და ეს გახდა მათი დაჭერის მთავარი მიზანი", - განაცხადა მურღულიამ.
მურღულიამ აღნიშნა, რომ "დემოკრატიული მოძრაობა-ერთიანი საქართველო" გვერდში დაუდგება ინდმეწარმეებს, "წარმომადგენლობით სახალხო კრებას" კი მოუწოდებს, რომ დაიცვან ამ ადამიანების უფლებები.
შეგახსენებთ, რომ სავაჭრო ცენტრების _ "კიდობანისა" და "პასაჟის" დაახლოებით 170 ინდმეწარმე დაიჭირეს.
