საზოგადოებრივი მოძრაობა "სოლიდარობა უკანონო პატიმრებს" ქსნის №7 კოლონიაში 19 აგვისტოს პატიმართა ცემის ინციდენტის შესწავლას ითხოვს. ამის შესახებ "ჯი-ეიჩ-ენს" საზოგადოებრივი მოძრაობიდან აცნობეს.
საზოგადოებრივმა მოძრაობამ "სოლიდარობა უკანონო პატიმრებს" საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარეს გია არსენიშვილს, სახალხო დამცველს გიორგი ტუღუშსა და სასჯელაღსრულების, პრობაციისა და იურიდიული დახმარების მინისტრს ხათუნა კალმახელიძეს განცხადებით მიმართა და ქსნის №7 კოლონიაში სასტიკი ცემის ინციდენტის შესწავლა და მასზე დაუყოვნებლივი რეაგირება მოითხოვა.
"მოძრაობამ მიიღო ქსნის კოლონიის 16 პატიმრის მიერ ხელმოწერილი წერილი, რომელშიც საუბარი იყო კოლონიაში პატიმართა წამებისა არაადამიანური მოპყრობის ფაქტებზე, გადამოწმების მიზნით ორგანიზაციის ადვოკატებმა შეძლეს რამდენიმე პატიმრის მონახულება, რომლებმაც მიაწოდეს საგანგაშო ინფორმაცია 19 აგვისტოს სპეცრაზმის მიერ 20 პატიმრის სასტიკი ცემის ინციდენტთან დაკავშირებით", - ნათქვამია განცხადებაში.
საზოგადოებრივ მოძრაობაში აცხადებენ, რომ ზემოხსენებული უწყებების პირდაპირი მოვალეობაა მწვავედ რეაგირებდეს საპატიმროებში პატიმართა წამების ფაქტებზე და მიმართოს გარკვეულ ზომებს, როგორც ფაქტების აღმოსაფხვრელად, ისე დამნაშავე პირების დასასჯელად.
აღნიშნული ინფორმაცია რეაგირებისთვის საერთაშორისო ორგანიზაციებს უკვე გადაეგზავნათ.
