"მიუხედავად იმისა, რომ ინვესტორებს ჰქონდათ ერთთვიანი ვადა ეკონომიკის სამინისტროში შეეტანათ განაცხადები, ერთი თვის განმავლობაში დარეგისტრირდა 48 ინვესტორი. მათგან რვა უცხოელია. ორშაბათიდან ფინანსთა და ეკონომიკის სამინისტრო დაიწყებს ხელშეკრულებების გაფორმებას აღნიშნულ ინვესტორებთან და ისინი ყველა იმ შეღავათებით ისარგებლებენ რომელიც პროექტითაა გათვალისწინებული"- განაცხადა ლევან ვარშალომიძემ.

მისი თქმით, მომავალი წლიდან პროექტის ამოქმედების შემდეგ ქობულეთს დამატებით 2 ათასამდე სასტუმროს ნომერი დაემატება და დაახლოებით 500 სამუშაო ადგილი შეიქმნება
შეგახსენებთ, რომ ქობულეთის "თავისუფალი ტურისტული ზონის" განვითარების მიზნით (ე.წ "ფიჭვნარის" ტერიტორია, ზღვიდან 140 მ-ის დაშორებით), სასტუმროების მშენებლობის საკითხთან დაკავშირებით, განაცხადების მიღება 15 სექტემბრიდან დაიწყო.
პროექტის ფარგლებში გამოყოფილია 3 მიწის ნაკვეთი (საერთო ფართით 11,3 ჰა), რომლებზედაც დაგეგმილია 27 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის განხორციელების მსურველს შეუძლია ამათგან გააკეთოს არჩევანი. განსაზღვრულია სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
აღსანიშნავია, რომ სამშენებლო მიწის ნაკვეთის განკარგვა განხორციელდება სიმბოლურ ფასად; დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ; ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.
იმ შემთხვევაში, თუ მშენებლობა დამთავრდება და ობიექტი ექსპლუატაციაში შევა 2011 წლის 1 აგვისტომდე, ინვესტორი გათავისუფლებული იქნება 15 წლით მოგებისა და ქონების გადასახადებისაგან.