პარლამენტის დარგობრივი ეკონომიკის კომიტეტის დღევანდელ სხდომაზე მთავრობის განკარგულების პროექტი განიხილეს. პროექტი წყლის ინფრასტრუქტურის რეაბილიტაციისათვის ევროპის საინვესტიციო ბანკიდან 40 მილიონი ევროს ოდენობის სესხის აღებას ითვალისწინებს.
მთავრობის განკარგულების პროექტი დეპუტატებს ფინანსთა მინისტრის მოადგილემ ნათია მიქელაძემ გააცნო.
საქართველოსა და ევროპის საინვესტიციო ბანკს შორის სასესხო ხელშეკრულება 2010 წლის 15 სექტემბერს დაიდო და პარლამენტის რატიფიცირებას საჭიროებს.
სესხი შეადგენს 40 მილიონი ევროს. მისი დაფარვისთვის გათვალისწინებულია 25 წელი. მათ შორის 5 წელი შეღავათიანი პერიოდია.
საპროცენტო განაკვეთი განსაზღვრულია ცვლადი საპროცენტოს წლიური 0,82 პროცენტით. ადმინისტრირების გადასახადი შეადგენს სესხის თანხის 0,5 პროცენტს, რომელიც არის ერთჯერადი გადასახადი 200 ათასი ევროს ოდენობით, ხოლო ვალდებულების გადასახადი წარმოადგენს სესხის აუთვისებელი ნაწილის წლიური 0,25 პროცენტს.
რაც შეეხება სესხის აღების მიზანს, აღნიშნული თანხით მოხდება წყალმომარაგების ქსელის რეაბილიტაცია.
სესხს აიღებს ფინანსთა სამინისტრო, ხოლო პროექტის განხორციელებას უზრუნველყოფს შპს "საქართველოს გაერთიანებული წყალმომარაგების კომპანია".
როგორც ნათია მიქელაძემ განმარტა, გათვალისწინებულია პროექტის სხვადასხვა რეგონში განხორციელება.
