2010 წლის 10-12 ოქტომბერს CENN-ი, რეგიონულ ორგანიზაციებსა და პარტნიორებთან თანამშრომლობით, ახორციელებს 10:10:10 კლიმატის ცვლილების კვირეულს ბათუმში. კვირას, მიმდინარე წლის 10 ოქტომბერს, მსოფლიოს მრავალრიცხოვანი ქვეყანა მიიღებს მონაწილეობას კლიმატის ცვლილების წინააღმდეგ მოქმედების გლობალურ დღეში. CENN უერთდება ამ საერთაშორისო ინიციატივას.
CENN-ის კლიმატის კვირეულის პროგრამის მიზანია საქართველოს მასშტაბით რამდენიმე "კლიმატური ცხელი წერტილებიდან" სტუდენტების მოწვევა, კლიმატის ცვლილების საკითხებთან დაკავშირებით მათი ცნობიერების ამაღლება და მდგრადობისთვის ხელის შეწყობა. გარდა ამისა, ინიციატივის მიზანია მთავრობებისათვის, ბიზნესისა და საზოგადოებისათვის მოწოდება ნახშირბადის გამონაბოლქვის 10%-ით შემცირებისაკენ 2010 წელს.
დაგეგმილი ღონისძიებები მოიცავს: კლიმატის ცვლილების თემაზე ახალგაზრდული წვეულება ბათუმის ბულვარში; მოძრავი ფოტოგამოფენა კლიმატის ცვლილების თემაზე ბათუმის სახელმწიფო უნივერსიტეტში, ბათუმის ზღვისპირა პარკში და 6 მაისის პარკში; დოკუმენტური ფილმების "სულელების ხანა" და "უხერხული სიმართლე" ჩვენება, რომლის შემდეგაც ჩატარდება დისკუსია სტუდენტებთან; კლიმატის ცვლილებისა და გარემოს დაცვის დარგებში ექსპერტების, საერთაშორისო ორგანიზაციებისა და ადგილობრივი თვითმმართველობის ორგანოების წარმომადგენლების მიერ განხორციელებული ღია ლექცია ბათუმის სახელმწიფო უნივერსიტეტში; სტუდენტური სემინარი კლიმატის ცვლილების შესახებ, სადაც იქნება წარმოდგენილი პრეზენტაციები კლიმატის ცვლილების ექსპერტებისა და საბუნებისმეტყველო ფაკულტეტის სტუდენტების მიერ; კლიმატის ცვლილების თემაზე მომავალი ღონისძიებების დაგეგმვა; და სტუდენტებს შორის გარემოსდაცვითი სოციალური რეკლამების კონკურსი.
ინიციატივა ხორციელდება CENN-ის მიერ, პროექტ კლიმატის ცვლილებასთან ადაპტაცია და ბუნებრივი კატასტროფების რისკის შემცირება (CCADM) ფარგლებში, USAID-ის, საქართველოში ევროკავშირის დელეგაციისა და ბრიტანეთის საბჭოს მხარდაჭერით.
CENN იწვევს ყველა დაინტერესებულ მხარეს ღონისძიებაში მონაწილეობის მისაღებად და კლიმატის ცვლილების წინააღმდეგ ბრძოლაში საკუთარი წვლილის შესატანად, 2010 წლის 10 ოქტომბერს, საღამოს 10 საათზე ბათუმის ბულვარში.
ინიციატივა 10/10/10 წარმოადგენს კამპანია 10:10-ისა და 350.ორგ-ის ერთობლივ გლობალურ ძალისხმევას კლიმატის ცვლილების წინააღმდეგ. კამპანია 10:10-ის ძირითადი მიზანია 2010 წლიდან საზოგადოების ყველა სექტორში სათბური აირების ემისიების 10%-ით შემცირების ხელშეწყობა. 350.ორგ-ის მისიას კი, მსოფლიოს მიერ კლიმატის ცვლილების პრობლემისადმი წინააღმდეგობის გაწევა და ჩვენი პლანეტისადმი ახალი პასუხისმგებლობის გრძნობის გაღვივებაა.
