საქართველო რუსეთის ვაჭრობის მსოფლიო ორგანიზაციაში გაწევრიანებას მხარს მანამდე არ დაუჭერს, ვიდრე მოსკოვი ქართველ მებაჟეებს აფხაზეთისა და ე.წ. სამხრეთ ოსეთის ტერიტორიებზე არ შეუშვებს. ამის შესახებ საქართველოს პრემიერ-მინისტრმა ნიკა გილაურმა "ასოშიეთიდ პრესისთვის" მიცემულ ინტერვიუში განაცხადა.
"საქართველო რუსეთისგან ამ ორგანიზაციის წესების შესრულებას ითხოვს. თბილისს სურს ქართველ მებაჟეებს რუსეთ-საქართველოს საზღვარზე მუშაობის საშუალება მიეცეთ. ჩვენ ვემხრობით რუსეთის გაწევრიანებას ვმო-ში, ამავე ორგანიზაციის წესების დაცვით", - აღნიშნა გილაურმა.
როგორც ცნობილია, ვმო-ში გაწევრიანებასთან დაკავშირებით აშშ-რუსეთმა მოლაპარაკები უკვე დასრულეს და კრემლში ვარაუდობენ, რომ რუსეთი მსოფლიო სავაჭრო ორგანიზაციის წევრი 8-10 თვეში გახდება. თუმცა, რუსეთის ვმო-ში გაწევრიანებისთვის საქართველოს თანხმობაც სჭირდება.
