"ბოლო ოთხი-ხუთი წლის განმავლობაში საქართველოში არ ყოფილა არც ერთი შეკვეთილი მკვლელობა _ თუკი ამას პოლიციური სახელმწიფო ეწოდება, მაშინ ვამაყობ, რომ საქართველოში პოლიციური სახელმწიფოა აშენებული", _ აცხადებს საქართველოს შს მინისტრი ვანო მერაბიშვილი რუსულ სააგენტო "რია ნოვოსტისთვის" მიცემულ ინტერვიუში და აღნიშნავს, საქართველოში 5-7-ჯერ შემცირდა დანაშაულის სიხშირე.
"ჰკითხეთ ნებისმიერ გამვლელს: როდის გაძარცვეს იგი ბოლოჯერ, როდის მოსტაცეს მას ავტომობილი, როდის გახადეს ტყავის ქურთუკი ან წაართვეს მობილური ტელეფონი? გააჩერეთ ნებისმიერი ათასი ადამიანი და ჰკითხეთ მას: იგი თვითონ ან მისი ახლობელი გაქურდეს თუ არა ბოლო ერთი წლის განმავლობაში?" _ აცხადებს მინისტრი და დასძენს, რომ საქართველოში არ არსებობს ისეთი ცნება, როგორიცაა რეკეტი.
საქართველოს შს მინისტრი რუსულ მედიასთან საუბარში რუს ჟურნალისტს საქართველოში არსებულ კრიმინოგენულ ვითარებას აცნობს და აცხადებს, რომ საქართველოში არ არის ორგანიზებული დანაშაული, საქართველოში არ იტაცებენ ხალხს და არ იტაცებენ ავტომობილებს.
"ბოლო 4-5 წლის განმავლობაში საქართველოში არ ყოფილა არც ერთი შეკვეთილი მკვლელობა. თუ ამას პოლიციური სახელმწიფო ეწოდება, მაშინ ვამაყობ, რომ საქართველოში პოლიციური სახელმწიფოა აშენებული. თუკი საზოგადოების ყველაზე კარგ წევრებს სურთ, რომ პოლიციელები გახდნენ, მიდის დიდი კონკურსი, 100 ადამიანიდან ერთს ირჩევენ და შემდეგ იგი არ იღებს ქრთამს - თუ ეს მიიჩნევა პოლიციურ სახელმწიფოდ, მაშინ ჩვენ გვეამაყება, რომ პოლიციური სახელმწიფო ვართ", _ აცხადებს საქართველოს შს მინისტრი.
