საპარლამენტო უმრავლესობა მიიჩნევს, რომ რუსეთსა და ბელორუსს შორის ურთიერთობების დაძაბვა "რუსეთის ფეოდალური ინტერესებითაა" განპირობებული. ამის შესახებ განცხადება საპარლამენტო უმრავლესობის წარმომადგენელმა ნუგზარ წიკლაურმა პარლამენტში ჟურნალისტებთან საუბრისას გააკეთა.
როგორც მან განაცხადა, რუსეთს ახასიათებს მეზობლებთან არაპარტნიორული ურთიერთობების დამყარება, რაც ამ ქვეყნის ფეოდალური ინტერესებითაა განპირობებული და არაფერი აქვს საერთო ცივილიზირებული სამყაროს ურთიერთობების ნორმებთან.
მისი თქმით, რუსეთი პოსტსაბჭოთა ქვეყნების ნებისმიერ აქტიურობას თავისუფლებისა და დამოუკიდებლობის გამოხატულებად აგრესიულად აღიქვამს და ამ აგრესიას ბლოკადებით ან თავდასხმებით პასუხობს. წიკლაურის თქმით, რუსეთის ასეთი პოზიცია ნებისმიერ შემთხვევაში გაუმართლებელია.
"ბელორუსს აქვს უფლება, ჰქონდეს ისეთი საგარეო და საშიანო პოლიტიკა, როგორც თავად ბელორუს ხალხს სურს და ეს არ არის რუსეთის გადასაწყვეტი", - აცხადებს წიკლაური და იმედოვნებს, რომ რუსეთის ასეთ ქმედებას რეაგირება მოჰყვება არა მარტო საერთაშორისო საზოგადოების მხრიდნ, არამედ თავად რუსეთის მოქალაქეების მხრიდან.
"თავად მოსახლეობა ხვვდება, რომ მეზობელი ქვეყნებისადმი მუქარა ისევ რუსეთს არ მოუტანს წარმატებას", _ აცხადებს იგი.
