საქართველოს ეროვნული ოლიმპიური კომიტეტის პრეზიდენტის გია ნაცვლიშვილის თქმით, 2010 წლის ვანკუვერის ზამთრის ოლიმპიადაზე, მოციგავე ნოდარ ქუმარიტაშვილის დაღუპვის მთავარი მიზეზი ტრასის გაუმართაობა იყო.
როგორც მან "ჯი_ეიჩ-ენს" განუცხადა, უბედურ შემთხვევასთან იყო მსგავსებები, თუმცა ტრასა რომ გამართული ყოფილიყო, ეს არ მოხდებოდა.
"ქუმარიტაშვილის დაღუპვა ტრასის გაუმართაობამ გამოიწვია. კანადის სასამართლოს მიერ გამოტანილი დასკვნა, სადაც ქუმარიტაშვილის დაღუპვა უბედურ შემთხვევათაა აღწერილი, გასაჩივრდება თუ არა, ქუმარიტაშვილის ოჯახი გადაწყვეტს. ჩვენ ინტენსიურ მოლაპარაკებებს ვაწარმოებთ მათთან და რაიმე გადაწყვეტილების მიღების შემთხვევაში ყველანაირად გვერდში დავუდგებით მათ", - განაცხადა ნაცვლიშვილმა.
შეგახსენებთ, რომ კანადის სასამართლომ ქუმარიტაშვილის დაღუპვა უბედურ შემთხვევად სცნო.
