დაღესტანში სპეცოპერაციის მსვლელობის დროს ერთო ბოევიკია მოკლული. ინფორმაციას ამის შესახებ რუსული მედია ნაციონალურ ანტიტერორისტულ კომიტეტზე დაყრდნობით ავრცელებს.
"ოპერაციის დროს ერთი ბანდიტი განადგურებულია. ამჟამად მისი ვინაობა დგინდება", _ იუწყება რუსეთის ნაციონალური ანტიტერორისტული კომიტეტი.
მათივე ინფორმაციით, დღეს დილით მახაჩკალაში გამიდოვისა და ენგელსის ქუჩებზე ოპერატიული შტაბი ატარებს ღონისძიებებს დაღესტნის ტერიტორიაზე მოქმედი დივერსიულ-ტერორისტული ჯგუფის წევრების განადგურებისათვის.
"რუსეთის "ეფ-ეს-ბეს" მიერ ბოევიკების ადგილსამყოფელის შესახებ მიღებული ინფორმაციის შემდეგ მითითებული მისამართების ბლოკირება მოხდა", _ იუწყება ანტიტერორისტული კომიტეტი.
სპეცოპერაციის აქტიური ფაზის დაწყებამდე, რუსმა ძალოვნებმა ალყაშემორტყმული რაიონიდან მოსახლეობის ევკუაცია მოახდინეს. ამჟამად ორივე მისამართი ალყაშემორტყმულია და იქ რუს ძალოვანთა დამატებითი ძალა და ტექნიკაა გადაყვანილი.
შეთავაზებაზე დაეყარათ იარაღი და ხელისუფლებას ჩაბარებოდნენ, სახლებში გამაგრებულმა ბოევიკებმა ცეცხლი გახსნეს. "შეტაკების შედეგად გამოყენებული ხელყუმბარის გამო ხუთსართულიანი სახლის მეოთხე სართულზე გაჩნდა ხანძარი, რომლის ლოკალიზებაც ანტიტერორისტული კომიტეტის წარმომადგენლებმა შეძლეს. უკვე დასრულებულია შენობის დათვალიერება. ერთი ბოევიკი მოკლულია", _ იუწყება ანტიტერორისტული კომიტეტი.
მეორე მისამართზე ენგელსის ქუჩაზე, რუსული მედიის ინფორმაციით, ბოევიკებმა ცეცხლის მშვიდობიანი მოქალაქეების მიმართულებით გახსნეს. შედეგად, მსუბუქად დაჭრილია ორი ახალგაზრდა, რომლებიც ამჟამად მახაჩკალის საავადმყოფოში არიან გადაყვანილნი.
ენგელსის ქუჩაზე სპეცოპერაცია ამჟამადაც მიმდინარეობს.
