ამ დღესთან დაკავშირებით "თელასში" ვეტერან ენერგეტიკოსთა შეხვედრა გაიმართა. საქართველოს ენერგოსექტორში 30, 40 და 50 წლის მუშაობის გამოცდილების მქონე ვეტერანებს დღესასწაული ენერგეტიკის სამინისტროს, „თელასის" და ვეტერან ენერგეტიკოსთა კავშირის წარმომადგენლებმა მიულოცეს.

დამსახურებულ ცხრა ენერგეტიკოსს, რომელთაგან ექვსი "თელასის" ყოფილი ან მოქმედი თანამშრომელია, ფასიანი საჩუქრები გადაეცა. აგრეთვე მათთვის შედგა ფოლკლორული ანსამბლის კონცერტი და ბანკეტი. ვეტერან ენერგეტიკოსთა კავშირის მიერ ორგანიზებული ღონისძიება `თელასის" ფინანსური მხარდაჭერით ჩატარდა.

"მინდა მადლობა გადაგიხადოთ თქვენი შრომისთვის. დღეს აქ მყოფი ენერგეტიკოსთა უმეტესობა "თელასში" მუშაობდა ან დღესაც მუშაობს. Aამ ვეტერანებმა ყველაფერი გააკეთეს კომპანიის განვითარებისთვის. გისურვებთ ჯანმრთელობას და კეთილდღეობას"- განაცხადა სს "თელასის" საზოგადოებასთან ურთიერთობის დეპარტამენტის უფროსმა ვალერი ფანცულაიამ.

საქართველოს ვეტერან ენერგეტიკოსთა კავშირისთვის სოციალური მხარდაჭერის პროგრამის განხორციელება სს "თელასმა" მიმდინარე წლის გაზაფხულზე დაიწყო.

ღვაწლმოსილი ენერგეტიკოსების თანადგომის შესახებ საქართველოს ენერგეტიკის მინისტრ ალექსანდრე ხეთაგურის ინიციატივას კომპანია `თელასი" ენერგეტიკულ კომპანიებს შორის პირველი გამოეხმაურა.

სოციალური მხარდაჭერის პროგრამა ვეტერან ენერგეტიკოსთა კავშირის ფინანსურ დახმარებას ითვალისწინებს, რომლის ფარგლებში კომპანიამ კავშირის წევრებს 15000 ლარი გამოუყო. აღნიშნული თანხა სოციალურად შეჭირვებული ვეტერანების ფინანსურ და სოციალურ თანადგომას მოხმარდება. ამასთანავე, კომპანია ვეტერან ენერგეტიკოსთა კავშირს ყოველთვიურად 600 ლარით ეხმარება.

ვეტერან ენერგეტიკოსთა კავშირი 2000 წელს ჩამოყალიბდა და საქართველოს ელექტრონერგეტიკის, გაზისა და ნავთობსამრეწველო სექტორში ხანგრძლივი წლების განმავლობაში მოღვაწე 250 გამოჩენილ ენერგეტიკოსს აერთიანებს. კავშირის მოღვაწეობის ძირითად სფეროს ქველმოქმედება წარმოადგენს, რაც ვეტერანების მატერიალურ დახმარებაში, სამედიცინო და მედიკამენტებით უზრუნველყოფაში, ცნობილი და დამსახურებული ენერგეტიკოსების შესახებ სტატიების მომზადებასა და საიუბილეო თარიღების ორგანიზებაში გამოიხატება.

გაერთიანებული ერების ორგანიზაციის გენერალური ასამბლეის გადაწყვეტილებით მოხუცთა საერთაშორისო დღე 1991 წლიდან ყოველწლიურად 1 ოქტომბერს აღინიშნება. ის ხანშიშესული მოქალაქეების პრობლემებისადმი საზოგადოებრივი დაინტერესების, პოლიტიკურ-ეკონომიკური, კულტურული და სულიერი ცხოვრების რიტმში მათი ჩართულობის, მოხუცთა შემოქმედებითი პოტენციალის რეალიზებისა და პიროვნული ღირსების დაცვის უზრუნველყოფას ისახავს მიზნად