კავკასიის გარემოსდაცვითი არასამთავრობო ორგანიზაციების ქსელმა (CENN) საქართველო - აზერბაიჯანის საზღვარზე ეროზიული პროცესების შესწავლა დაიწყო. ორგანიზაცია შინაგან საქმეთა, საგარეო და გარემოს დაცვის სამინისტროებიდან ითხოვს ინფორმაციას რა პრინციპით არის გავლებული საზღვარი დედოფლისწყაროს რაიონის ჩრდილო - აღმოსავლეთ ნაწილში მდინარე ალაზნის გამოხატულ კლაკნილებზე (მეანდრებზე).
„საქართველო-აზერბაიჯანის საზღვრის მონაკვეთი სიღნაღის რაიონის მთელ სიგრძეზე და დედოფლისწყაროს რაიონის ჩრდილო-აღმოსავლეთ ნაწილში მდინარე ალაზნის გამოხატულ კლაკნილებზე (მეანდრებზე) გადის. ადგილ-ადგილ მდინარე რეცხავს და ავიწროვებს მეანდრებთან დამაკავშირებელ ვიწრო ყელს, რაც ადამიანური თუ ბუნებრივი ფაქტორებითაა გამოწვეული. შედეგად, ასობით ჰექტარი ტერიტორია მდინარის გაღმა რჩება", - აღნიშნავს ასოციაცია CENN-ის ღია გარემოსდაცვითი სამოქალაქო ინიციატივის კოორდინატორი რეზო გეთიაშვილი.
მისივე თქმით, ასეთ სიტუაციაში საქართველოს მხრიდან ყველაზე ეფექტური ღონისძიება ნაპირსამაგრი სამუშაოების განხორციელება და მეანდრებთან დამაკავშირებელი ყელების შენარჩუნებაა.
„ამასთან ერთად, მნიშვნელოვანია ის დოკუმენტაცია, რაც აღნიშნულ ნაწილში საქართველოს საზღვრებს ადგენს. ამ ეტაპზე საქართველო-აზერბაიჯანის საზღვრის დემარკაცია გაკეთებული არ არის და სახემძღვანელოდ საბჭოთა პერიოდის ნორმატიული აქტები რჩება. ჩვენი ინფორმაციით, რიგ ადგილებში საზღვრის დასადგენად მონიშნულია კოორდინატები, რიგ ადგილებში კი ასეთი კოორდინატები არ არსებობს და ქვეყნებს შორის ბუნებრივ საზღვრად მდინარეა აღებული. ამ ეტაპზე ვითხოვთ ინფორმაციას, რა პრინციპითაა გავლებული საზღვარი აღნიშნულ მონაკვეთზე, დადგენილია თუ არა კოორდინატები და რა დოკუმენტაციით სარგებლობს საქართველოს მხარე სახელმწიფო საზღვრის იდენტიფიცერებისთვის საზღვრის დემარკაციამდე. ეს ინფორმაცია მნიშვნელოვანი იქნება მდინარე ალაზანზე ნაპირდაცივითი ზომების მიღების მიზანშეწონილობის დასადგენად", - ამბობს რეზო გეთიაშვილი.