ეს არ არის პირველი ანტიდასავლური განცხადება ბოლო პერიოდში, ასევე, უაღრესად გულდასაწყვეტი და საგანგაშო იყო მისი განცხადება ევროპული და ზოგადად დასავლური კოლონიალიზმისა და მათი ამოცანების შესახებ, - ასე შეაფასა „ევროპული საქართველოს“ ერთ-ერთი ლიდერმა, დავით ბაქრაძემ საქართველოს ყოფილლი პრეზიდენტის მიხეილ სააკაშვილის ინტერვიუ, რომელიც „მთავარ არხს“ მისცა.
“სინანულით მინდა აღვნიშნო - ინტერვიუმ კიდევ ერთხელ აჩვენა, თუ რამდენად დაცილდა მიხეილ სააკაშვილი ქვეყანაში არსებულ პოლიტიკურ რეალობას და იმ ფუნდამენტურ ღირებულებებს, რომელზე დაყრდნობითაც, ის 2004 წელს თავის გუნდთან ერთად იწყებდა ქვეყანაში რეფორმებს და აშენებდა დასავლურ, ტოლერანტულ, თანამედროვე ქართულ სახელმწიფოს.
მხედველობაში მაქვს გიგა ბოკერიას წინააღმდეგ წარმოებული შეტევა. მინდა ვიყო ძალიან მკაფიო - პრობლემა არ არის გიგა ბოკერიას კრიტიკაში, პრობლემა არის ის, როცა მიხეილ სააკაშვილი ლევან ვასაძის და ქართული მარშის ტერმინოლოგიის გამოყენებით და მათი არგუმენტებით აკრიტიკებს ვინმეს, მათ შორის, თუნდაც გიგა ბოკერიას. ეს ძალიან გულდასაწყვეტია, იმიტომ რომ საუბარი გვაქვს ლიდერზე, რომლის ხელმძღვანელობითაც მაშინდელი გუნდი 2004 წელს აშენებდა სულ სხვა, თანამედროვე ფასეულობებზე დამყარებულ ქართულ სახელმწიფოს.
მით უმეტეს, რომ ეს არ არის პირველი ანტიდასავლური განცხადება ბოლო პერიოდში, ასევე, უაღრესად გულდასაწყვეტი და საგანგაშო იყო მისი განცხადება ევროპული და ზოგადად დასავლური კოლონიაზმის და მათი ამოცანების შესახებ”, - თქვა ბაქრაძემ.
შეგახსენებთ, რომ 2019 წლის აპრილში მიხეილ სააკაშვილმა ვარშავაში უკრაინელებთან შეხვედრაზე განაცხადა, რომ: „ევროპელებს სურთ, რომ უკრაინა არსებობდეს, რომ ის იყოს წარმატებული, თუმცა რაღაც ჩარჩოების ფარგლებში. ძალიან წარმატებული უკრაინა არავის სჭირდება, თავს ნუ მოვიტყუებთ“. ამავე შეხვედრაზე სააკაშილმა თქვა, რომ „ერთ მხარეს პუტინია, მეორე მხარეს კი დასავლეთი ასევე კოლონიალური მიდგომებით“.
209 წლის აგვისტოში IWPR-თან ინტერვიუში მიხეილ სააკაშვილმა თქვა, რომ „დასავლეთს აქვს რაღაც დამოკიდებულება, რაც კოლონიალიზმის გადმონაშთი მგონია. ამასთან მართლა ფიქრობენ, რომ პატარა ახალბედების ადგილი მაგიდასთან არაა“
