პრემიერ-მინისტრობის კანდიდატმა, გიორგი გახარიამ, პარტია „ნაციონალური მოძრაობის“ ფრაქციის წევრებთან საპარლამენტო გამოსვლის დასრულების შემდეგ, მედიასთან კომენტარი გააკეთა. მისი განცხადებით, ტყუილი, რომელიც მაკო გომურის პარლამენტთან ყოფნას ეხებოდა, არის განსახიერება თუ როგორ სიცრუეში აცხოვრებდნენ წლების განმავლობაში ისინი საზოგადოებას.
„ჩვენი მიზანი არის ის, რომ ეს სიცრუე დავასრულოთ. ჩვენი მიზანი არის ის, რომ როდესაც მოდელირებული რეალობით ცდილობს ნაციონალური მოძრაობა დღეს რადიკალიზაციის გაზრდას და რაღაც რევოლუციური განწყობების მოლოდინების შექმნას, რაც უბრალოდ შეუძლებელია. სიმართლე მდგომარეობს იმაში, რომ 20 ივნისს, როდესაც ადამიანები გამოთქვამდნენ მშვიდობიან პროტესტს, ზოგიერთმა უპასუხისმგებლო პოლიტიკოსმა მათ მოუწოდა და ისინი ორგანიზებულად შტურმით წაიყვანა სახელმწიფო ინსტიტუტზე. უბედურება და სიმართლე მდგომარეობს იმაში, რომ ამის შედეგად ჩვენ გვყავს დაზარალებული როგორც ჩვენი მოქალაქეები, ისე პოლიციელები და ვერც ერთი პოლიტიკოსი ვერ იქნება დათრგუნული შედეგებით ისე, როგორც მე ვარ ამ ღამის შემდეგ“, - თქვა გახარიამ. რა თქმა უნდა სიმართლე არის იმაში, რომ ჩვენ გვყავს 2 ადამიანი, რომლებმაც დაკარგეს თვალი. ეს ყველაფერი სიმართლეა, მაგრამ ამასთან ერთად, სიმართლე არის ის, რომ ჩვენმა უპასუხისმგებლო ოპოზიციამ თვალიდან ხელი უნდა მოიშოროს და დაინახოს - სიმართლეს თვალი უნდა გაუსწოროს. ჩვენ ჩვენს საზოგადოებას უნდა ვესაუბროთ სიმართლის და პასუხისმგებლიანი ენის საშუალებით და არა იმ სპექტაკლებით, რომლებსაც ვაწყობთ პარლამენტში და ჩვენ პატივი უნდა ვცეთ ინსტიტუტებს.“ - განაცხადა გიორგი გახარიამ.
„ნაციონალურმა მოძრაობამ“ პროტესტის ნიშნად პრემიერ-მინისტრობის კანდიდატის გიორგი გახარიას მოსმენა შეწყვიტა. ენმ ითხოვდა 20 ივნისის ღამეს დაშავებული მაკო გომური და სხვა მოქალაქეები სხდომაზე დასასწრებად პარლამენტის შენობაში შემოეშვათ. მაკო გომური პარლამენტის შენობაში არ შეუშვეს, რაც სხდომის დატოვების მიზეზი გახდა. "ჩვენ არ მიგვაჩნია მიზანშეწონილად თქვენი გამოსვლის მოსმენა ასეთ პირობებში და ვწყვეტ სხდომას", - თქვა ფრაქციის თავმჯდომარემ რომან გოცირიძემ.
20 ივნისს დაშვებულმა მაკო გომურმა კი სოციალურ ქსელში დაწერა, რომ ის თბილისში არ იმყოფება.
„არ ვარ თბილისში. კახეთის გზატკეცილზე ვარ და პარლამენტის სხდომას თუ დამაწევთ გზაში, კი ბატონო, შევალ. ისე, ხუთი წუთით ადრე რომ ვიგებ, რომ საშვი ყოფილა დაშვებული, კარგი მიდგომაა“, – დაწერა სოციალურ ქსელში მაკო გომურმა.
