დამოუკიდებლობითა და კვალიფიკაციით ცნობილი მოსამართლეები სიმბოლურადაც კი არ მოახვედრეს ოცეულში, - ამის შესახებ "ევროპული საქართველოს“ ერთ-ერთმა ლიდერმა, დეპუტატმა გიგა ბოკერიამ განაცხადა.
მისი თქმით, სიამ დაადასტურა, რომ ივანიშვილის ამოცანაა კორუმპირებული კლანით დაამყაროს კონტროლი უზენაეს სასამართლოზე.
"სხვათა შორის, სიმბოლურია, რაც უცებ ვნახე, რომ ის რამდენიმე გამონაკლისი მოსამართლეობის კანდიდატი, რომელიც წინა ხელისუფლების დროს ცნობილი იყო და ახლაც ცნობილია დამოუკიდებლობით, მაღალი რეპუტაციითა და კვალიფიკაციით, მაგალითად ქალბატონი კოპალიანი, სიმბოლურადაც კი არ მოახვედრეს ოცეულში. ეს არის რეალობა, ამიტომ ამას მოჰყვება პროტესტი პარლამენტში და პარლამენტს გარეთ. საბოლოო ჯამში, გარდატეხა ამ სისტემაში მოხდება ივანიშვილის ხელისუფლების შეცვლის შემდეგ იმ დიდი რეფორმებით, რომელიც შემდგომმა ხელისუფლებამ უნდა ჩაატაროს მართლმსაჯულების მიმართულებით“, - განაცხადა გიგა ბოკერიამ.
იუსტიციის უმაღლესმა საბჭომ პარლამენტში წარსადგენად უზენაესი სასამართლოს მოსამართლეობის 20 კანდიდატი შეარჩია.
ეს კანდიდატები არიან: თამარ ალანია; მერაბ გაბინაშვილი; შოთა გეწაძე; მირანდა ერემაძე; მამუკა ვასაძე; მაია ვაჩაძე; თამარ ზამბახიძე; შალვა თადუმაძე; ზაზა თავაძე; ვლადიმერ კაკაბაძე; ლევან მიქაბერიძე; გიორგი მიქაუტაძე; პაატა სილაგაძე; ნუგზარ სხირტლაძე; ლალი ფაფიაშვილი; ნინო ქადაგიძე; ლაშა ქოჩიაშვილი; ქეთევან ცინცაძე; ალექსანდრე წულაძე და გოჩა ჯეირანაშვილი.
