საბჭოთა კავშირი როდესაც დაინგრა, ჩემი გადმოსახედიდან ყოველ შემთხვევაში, ეს იყო ჰუმანიტარული კატასტროფა პოსტსაბჭოთა ქვეყნების მაცხოვრებლებისთვის, - განაცხადა ქართული ოცნების ყოფილმა წევრმა, დეპუტატმა ბექა ნაცვლიშვილმა.
მისი თქმით, ამის მიზეზი ის იყო, რომ დაგეგმითი ეკონომიკიდან საბაზრო ეკონომიკაზე „ძალიან სწრაფად გადავედით და რა თქმა უნდა, ადამიანებმა ამას ფეხი ვერ აუწყვეს“.
„შესაბამისად, ჩვენ, რიგი ქვეყნები ვიმყოფებით იგივე ტრაგიკულ და კატასტროფულ მდგომარეობაში, როგორშიც ჩვენ ვიმყოფებოდით 30 წლის წინ. რაც არ უნდა ერთმანეთს ვატყუოთ, რომ შუშის შენობები გვაქვს და ა.შ. ვიცით, რომ ვითარება ეკონომიკურად და სოციალურად ჩვენი მოქალაქეებისთვის არის ძალიან მძიმე.
თუ გვახსოვს, როდესაც მეორე მსოფლიო ომი დამთავრდა ამერიკის ხელისუფლებამ ევროპაში გადაწყვიტა ე.წ. მარშალის გეგმის განხორციელება, რაც გულისხმობდა იმას, რომ ეს იყო ერთგვარი შეკავების პოლიტიკის შემადგენელი ნაწილი, რომ საბჭოთა კავშირი თავისი ტენდენციით ვითარდებოდა, რადგან ევროპა თითქმის დანგრეული იყო, შეიძლება ვთქვათ, იზრდებოდა საბჭოთა კავშირის მიმართ სიმპათიები ევროპაში და ამერიკამ გადაწყვიტა რომ ეს რამენაირად შეეჩერებინა და განეხორციელებინა მარშალის გეგმა, რომელიც ევროპას ფეხზე დააყენებდა“, - განაცხადა ნაცვლიშვილმა.
