„ის რომ საქართველო აღიარებულია ლიდერ ქვეყანად ჩვენი ევროპელი პარტნიორების მხრიდან, მათ შორის "აღმოსავლეთ პარტნიორობის" ფორმატში და არა მარტო, ეს არის მნიშვნელოვანი მიღწევა და ამაზე ყველა ღიად საუბრობს", - ამის შესახებ საქართველოს საგარეო საქმეთა მინისტრის მოვალეობის შემსრულებელმა დავით ზალკალიანმა პარლამენტში სამი კომიტეტის გაერთიანებულ სხდომაზე სიტყვით გამოსვლისას განაცხადა, სადაც მთავრობის საგარეო პოლიტიკის სხვა პრიორიტეტებთან ერთად ისაუბრა საქართველოს ევროკავშირში ინტეგრაციის საკითხებზე.
დავით ზალკალიანის განცხადებით დღეს ევროკავშირის წინაშე არსებული გამოწვევების მიუხედავად, საქართველო გააგრძელებს თანმიმდევრული ნაბიჯების გადადგმას ქვეყნის უმთავრესი მიზნის - ევროკავშირის სრულფასოვანი წევრობისკენ.
მისი განცხადებით საქართველო, მათ შორის უკვე აქტიურად არის ჩართული საკონსულტაციო პროცესი, რომლის მიზანია აღმოსავლეთ პარტნიორობის ახალი სტრატეგიული ხედვისა და 2020 წლის შემდგომი მიზნების განსაზღვრა. საგარეო საქმეთა სამინისტრო ყველა უწყებასთან ერთად მუშაობს მთავრობის წინადადებებზე „აღმოსავლეთ პარტნიორობის" მომავალთან დაკავშირებით, რომელიც გადაეცემა ევროკავშირს.
ასევე გრძელდება მუშაობა საქართველოს ევროკავშირში ინტეგრაციის საგზაო რუკის რეალიზაციის მიზნით, ასევე იმ მექანიზმის ჩამოსაყალიბებლად, რომელიც დაეხმარება საქართველოს ევროკავშირის კანონმდებლობასთან თავსებადობის გასაანალიზებლად და ამ მიმართულებით ახალი ნაბიჯების დასაგეგმად.
დასრულდა მუშაობა საქართველოს ევროკავშირში ინტეგრაციის საგზაო რუკაზე, რომელიც ევროკავშირის მხარეს გადაეცა. დოკუმენტი ასახავს მთავრობის რეალისტურ ხედვას, რომლის მიზანია ევროკავშირთან მეტი ფუნქციონალური ინტეგრაცია და ქვეყნის მომზადება იმ პოლიტიკური მიზნისთვის, რასაც ევროკავშირში გაწევრიანება ჰქვია.
წარმატებით მიმდინარეობდა ასოცირების შეთანხმებისა და ღრმა და ყოვლისმომცველი თავისუფალი სავაჭრო სივრცის კომპონენტის განხორციელება შემუშავდა ასოცირების შეთანხმებისა და ასოცირების დღის წესრიგის განხორციელების 2018 წლის ეროვნული სამოქმედო გეგმის ანგარიში და2019 წლის ეროვნული სამოქმედო გეგმა.
გასულ პერიოდში, საქართველოსა და ევროკავშირს შორის ხელი მოეწერა 4 საფინანსო შეთანხმებას, რომლის ფარგლებში საქართველო ევროკავშირისგან 145 მილიონამდე ევროს ოდენობის ფინანსურ დახმარებას მიიღებს.
საქართველო აქტიურად თანამშრომლობდა „აღმოსავლეთ პარტნიორობის" მრავალმხრივი ფორმატის ფარგლებში, კერძოდ
საქართველო გრძელდება „2020 წლისთვის 20 შედეგი" გათვალისწინებული ქმედებების გატარება.
ქ. თბილისში „აღმოსავლეთ პარტნიორობის" გაიხსნა ევროპული სკოლა, რომელიც მიმდინარე სასწავლო წელს მოსწავლეთა მეორე ნაკადს იღებს.
ბათუმში გაიმართა მაღალი დონის საერთაშორისო კონფერენცია „საქართველოს ევროპული გზა", რომელიც აღმოსავლეთ პარტნიორობის 10 წლისთავს მიეძღვნა.
საქართველო განაგრძობდა ევროკავშირის ჩარჩო პროგრამებში ERASMUS+, CREATIVE EUROPE; HORIZON 2020 წარმატებით მონაწილეობას, ასევე მიმდინარეობს დამატებით, ახალ ჩარჩო პროგრამებში ჩართულობის შესაძლებლობებისა და სარგებლიანობის შესწავლა.
გრძელდება ევროკავშირის სპეციალიზირებულ სააგენტოებთან თანამშრომლობა: კერძოდ ინტენსიური თანამშრომლობა ჩამოყალიბდა ევროპოლ-თან, ხელი მოეწერა ევროჯასტ-თან თანამშრომლობის შეთანხმებას; მიმდინარეობს კონსულტაცია ევროკავშირის სასაზღვრო-სანაპირო დაცვის, ევროპის რკინიგზის და ასევე სხვა სააგენტოებთან ინსტიტუციური თანამშრომლობის ინიცირების მიმართულებით.
საქართველო აგრძელებს ევროკავშირთან უსაფრთოხებისა და თავდაცვის სფეროში თანამშროლობის გაღრმავებას და მნიშვნელოვანია, რომ ჩვენ უკვე ვართ არა მხოლოდ ბენეფიციარი, არამედ თავადაც შეაქვს წვლილი საერთო ევროპული უსაფრთხოების უზრუნველყოფაში, მათ შორის მონაწილეობს ევროკავშირის მისიებში (ცენტრალური აფრიკის რესპუბლიკასა და მალიში), ასევე თანამშრომლობას უსაფრთხოების საკითხებზე მაღალი დონის სტრატეგიული დიალოგის ფორმატში, რომლის მესამე შეხვედრა დაგეგმილია 25 ოქტომბერს ქ. თბილისში.
მნიშვნელოვანი ძალისხმევა იქნა გაწეული ევროკავშირთან სექტორული ინტეგრაციის კუთხით თანამშროლობის გაღრმავების მიმართულებით. ამ მხრივ უმნიშვნელოვანესი იყო საქართველო-ევროკავშირის თანამშრომლობის ახალი ფორმატის დაფუძნება.
2018 წლის 21 ნოემბერს ქ. ბრიუსელში საქართველოს მთავრობისა და ევროკომისიის წევრების მონაწილეობით, გაიმართა უმაღლესი დონის პირველი შეხვედრა. სადაც საფუძველი ჩაეყარა რიგ ინიციატივებს, რომლებზეც ორმხრივ ფორმატში გაგრძელდება მუშაობა.
ჩატარდა საქართველო-ევროკავშირის ასოცირების დარგობრივი ქვეკომიტეტის 6 თემატური ჯგუფის სხდომა.
საქართველოს მთავრობა აქტიურად მუშაობდა ევროკავშირთან უვიზო მიმოსვლის შეუფერხებელი ფუნქციონირების უზრუნველსაყოფად. კერძოდ ევროკომისიასთან ერთად შემუშავდა ერთობლივი სამოქმედო ზომები, რომლებიც ითვალისწინებს კონკრეტული ქმედებების განხორციელებას სხვადასხვა მიმართულებით, მათ შორის სასაზღვრო კონტროლის გამკაცრების კუთხით.
გრძელდებოდა კონსულტაციები წევრ ქვეყნებთან საქართველოს უსაფრთხო წარმოშობის ქვეყნად აღიარების მიზნით, (დღესდღეობით, ევროკავშირის/შენგენის 20 ქვეყნიდან საქართველოს უსაფრთხო ქვეყნად აღიარებს 15 ქვეყანა: ბულგარეთი, საფრანგეთი, ლიხტენშტაინი, ავსტრია, ბელგია, ნიდერლანდები, ისლანდია, ლუქსემბურგი, ირლანდია, ესტონეთი, დანია, ჩეხეთი, კვიპროსი, სლოვენია. მათ შორის აღსანიშნავია, რომ საქართველო უსაფრთხო ქვეყნად აღიარა ასევე შვეიცარიამ, აღნიშნული საკანონმდებლო ცვლილება ძალაში შევა 1 ოქტომბერს).
