"აღიარებულ რეფორმატორი - გიორგი გახარია, საქართველოს განვითარების გარდამტეხ მომენტში მოდის ეკონომიკურ და უსაფრთხოების სფეროებში თავისი სიღრმისეული გამოცდილებით "- ამერიკული გამოცემა "Newswire" საქართველოში სამთავრობო ცვლილებებს და გიორგი გახარიას პრემიერ-მინისტრად წარდგენას ეხმაურება.
გამოცემის სტატიაში აღნიშნულია, რომ "ქართული ოცნება - დემოკრატიული საქართვლოს“ მმართველმა პარტიამ გიორგი გახარია, რომელიც ამჟამად ვიცე-პრემიერის, შინაგან საქმეთა მინისტრისა და ეროვნული უსაფრთხოების საბჭოს მდივნის თანამდებობას იკავებს, საქართველოს პრემიერ მინისტრის პოსტზე წარადგინა.
"განცხადების გაკეთებას წინ უძღოდა პარტიის ხელმძღვანელობის შეხვედრა და პრემიერ მინისტრის, მამუკა ბახტაძის გუშინდელი გადადგომა. ნომინირებული პრემიერ მინისტრი 2 კვირის ვადაში პარლამენტს დასამტკიცებლად წარუდგენს მთავრობის შემადგენლობას, რომელიც მარტივი უმრავლესობის მხარდაჭერას, სულ მცირე 76 პარლამენტარის ხმას საჭიროებს.
გახარიამ აღნიშნა: „დღეს, ამ გადაწყვეტილების შემდეგ, წარმოგიდგენთ მთავრობის ახალ შემადგენლობასა და პროგრამას. მსურს გაცნობოთ, რომ განხორციელდება მცირედი ცვლილებები მთავრობის შემადგენლობაში. დარწმუნებული ვარ, აღნიშნული ცვლილებები გააძლიერებს გუნდს და გახდის მას უფრო ეფექტიანს, რაც უაღრესად მნიშვნელოვანია“.
გახარიას კარიერა გამოირჩევა მნიშვნელოვანი რეფორმების გატარებით და სხვადასხვა სამთავრობო ინსტიტუტებში ცვლილებების ხელმძღვანელობით. მას აქვს დიდი გამოცდილება საქართველოს მთავრობაში ეკონომიკური და უსაფრთხოების პორტფელების წარმატებული მართვის. ის ხელმძღვანელობდა მნიშვნელოვან ინიციატივებს საქართველოს ევროპული და ევროატლანტიკური ინტეგრაციის მიმართულებით, ბიზნესზე ორიენტირებული ეკონომიკის ხელშეწყობას, და პირდაპირი უცხოური ინვესტიციების მოზიდვას, რაც აისახა დასაქმებისა და ეკონომიკის ზრდაში.
გახარიამ არაერთი წარმატებული და მასშტაბური რეფორმა განახორციელა მნიშვნელოვან სახელმწიფო უწყებებში. 2016-2017 წლებში ის იყო ეკონომიკისა და მდგრადი განვითარების მინისტრი, 2014-2016 წლებში - ეკონომიკური საბჭოს მდივანი, 2013-2016 წლებში კი ბიზნეს ომბუდსმენი.
ეროვნული უსაფრთხოების საბჭოს მდივნის რანგში, გახარია უძღვება სახელმწიფო უსაფრთხოების დაგეგმარებისა და კოორდინაციის საკითხებს, რათა გამყარდეს აღნიშნულ სფეროში საქართველოს თანამშრომლობა მის მეკავშირეებთან ამერიკის შეერთებულ შტატებსა და ევროპაში და გაძლიერდეს ძალისხმევა ქვეყნის ევროატლანტიკური ინტეგრაციისკენ.
შინაგან საქმეთა მინისტრობის პერიოდში, გიორგი გახარიას ინიციატივით განხორციელდა არაერთი რეფორმა, რაც მიზნად ისახავდა უფრო გამჭვირვალე, ღია, ეფექტური და ანგარიშვალდებული ინსტიტუციის ჩამოყალიბებას. აღნიშნულის პარალელურად, მას მოუწია არაერთი რთული არჩევანის გაკეთება ქვეყანაში უსაფრთხოებისა და სტაბილურობის შესანარჩუნებლად. ის გამუდმებით აცხადებდა, რომ „დანაშაულის წინააღმდეგ ბრძოლა აზრს კარგავს ადამიანის უფლებების დაცვის გარეშე.“ მისი მინისტრობის პერიოდში, შინაგან საქმეთა სამინისტროში პირველად შეიქმნა ადამიანის უფლებათა დაცვის დეპარტამენტი, რომელიც სხვა რეფორმებთან ერთად, მიზნად ისახავდა მოწყვლადი ჯგუფების მიმართ ჩადენილი დანაშაულების გამოძიების სტანდარტის გაუმჯობესებას. რეფორმის ფარგლებში, პოლიციის ოფიცრებმა გაიარეს სხვადასხვა ტრენინგი, რაც აღნიშნული ჯგუფების მიმართ მათი სენსიტიურობის გაზრდას ემსახურებოდა.
შინაგან საქმეთა სამინისტროს გამჭვირვალობისა და გახსნილობის ხარისხის გაზრდისთვის, მინისტრმა გახარიამ დანაშაულის სტატისტიკის რეგულარული გამოქვეყნების სისტემა დანერგა. IDFI-ის (ინფორმაციის თავისუფლების განვითარების ინსტიტუტი) ბოლო ანგარიშის თანახმად, მისი სამინისტრო დასახელებულ იქნა ერთ-ერთ ყველაზე გამჭვირვალე სახელმწიფო ინსტიტუციად.
შინაგან საქმეთა სამინისტრომ შექმნა პლატფორმა არასამთავრობო სექტორთან რეგულარული თანამშრომლობისთვის. მაღალი საზოგადოებრივი ინტერესის საკითხებზე პარლამენტის წევრთა კითხვების საპასუხოდ გახარია პარლამენტის წინაშე რეგულარულად ჩნდებოდა.
თავისი კარიერის განმავლობაში, სხვა წარმატებათა შორის, გახარიამ გამოავლინა ძლიერი ლიდერობა ფუნდამენტური ეკონომიკური რეფორმების, კაპიტალის ბაზრის რეფორმის გასატარებლად და ბიზნესის ინიციატივების მხარდასაჭერად
საჯარო სამსახურის დაწყებამდე გახარია მუშაობდა კერძო სექტორში სხვადასხვა პოზიციაზე, მათ შორის ის იყო „Lufthansa Service Holding AG" ბიზნესის განვითარების დირექტორი", - წერს გამოცემა.
სტატიის სრული ვერსია - www.prnewswire.com/news-releases/georgias-vice-prime-minister-giorgi-gakharia-nominated-as-new-prime-minister-300910608.html
