საქართველოს პარლამენტის დადგენილებით ზაქარია ქუცნაშვილს ვადამდე ადრე შეუწყდა საქართველოს პარლამენტის წევრის უფლებამოსილება.
„საპროცედურო საკითხთა და წესების კომიტეტმა განიხილა ეს საკითხი და მიიჩნია, რომ მას უნდა შეუწყდეს პარლამენტის წევრის უფლებამოსილება", - განაცხადა საპროცედურო საკითხთა და წესების კომიტეტის თავმჯდომარემ გიორგი კახიანმა.
ზაქარია ქუცნაშვილმა პარლამენტის თავმჯდომარეს უფლებამოსილების შეწყვეტის თაობაზე განცხადებით 28 ივნისს მიმართა.
ზაქარია ქუცნაშვილი საქართველოს პარლამენტში თიანეთის, ყაზბეგის და დუშეთის მაჟორიტარი დეპუტატი იყო. საქართველოს საარჩევნო კანონმდებლობის თანახმად, აღნიშულ მაჟორიტარულ ოლქში პარლამენტის შუალედური არჩევნები აღარ ჩატარდება.
უკვე ყოფილმა პარლამენტარმა ზაქარია ქუცნაშვილმა უფლებამოსილების შეწყვეტის თაობაზე გადაწყვეტილება მას შემდეგ მიიღო, რაც საპარლამენტთაშორისო მართლმადიდებლობის ასამბლეის ფარგლებში, რუსეთის დუმის დეპუტატმა სერგეი გავრილოვმა საქართველოს პარლამენტის თავმჯდომარის სავარძლიდან გახსნა ასამბლეა, რასაც საზოგადოების მხრიდან მძაფრი რეაქცია მოჰყვა.
