ოკუპირებული აფხაზეთის ე.წ. მინისტრთა კაბინეტმა მიიღო გადაწყვეტილება, რომ სოხუმის აეროპორტს მიენიჭოს „საერთაშორისო კოდი URAS”. ინფორმაციას „აფხაზია-ინფორმი“ ავრცელებს.
თვითნებურად მინიჭებული კოდი იშიფრება შემდეგნაირად: U - აღნიშნავს დსთ-ში შემავალ ქვეყნებს, R - როსტოვის საჰაერო ზონას, სადაც მდებარეობს საჰაერო ნავიგაცია საერთაშორისო ფრენებისთვის, A - აფხაზეთი, S - სოხუმი.
ოკუპირებული აფხაზეთის ე.წ. პრეზიდენტმა რაულ ხაჯინბამ განაცხადა, რომ აეროპორტის გახსნა რუსულ-აფხაზურ ურთიერთობებს კიდევ უფრო გააუმჯობესებს და გაზრდის ტურისტულ ნაკადებს და ინვესტორების ინტერესებს.
შეგახსენებთ, რომ სოხუმის აეროპორტი 27 წელია არ ფუნქციონირებს.
25 მაისს რუსეთის მიერ ოკუპირებული აფხაზეთის ე.წ. პრეზიდენტმა რაულ ხაჯინბამ ხელი მოაწერა განკარგულებას, რომლის მიხედვითაც სოხუმის აეროპორტი გამოყენებული იქნება როგორც სამხედრო ასევე სამოქალაქო ავიარეისებისათვის.
სოხუმის აეროპორტი 1960 წელს აშენდა და განთავსებულია სოხუმის სამხრეთ-აღმოსავლეთ ნაწილში, ქალაქიდან 18 კილომეტრის მოშორებით, შავი ზღვის სანაპიროსთან.
აღსანიშნავია, რომ აეროპორტებისთვის საერთაშორისო კოდის მინიჭებას მხოლოდ სამოქალაქო ავიაციის საერთაშორისო ორგანიზაცია - ICAO ახორციელებს.
