არსებობს საკითხები, რომლებსაც სისხლის სამართლის კოდექსის შესაბამისი მუხლი განსაზღვრავს, - ასე უპასუხა საპარლამენტო უმრავლესობის ლიდერმა, გია ვოლსკიმ ჟურნალისტების შეკითხვას: დააპატიმრებენ თუ არა „თიბისი ბანკის“ დამფუძნებლებს.
„პატიმრობის თემასთან დაკავშირებით ფრთხილად უნდა ვილაპარაკოთ ადამიანებმა, ვისთვისაც მთავარი დამახასიათებელი ნიშანი ჰუმანურობაა უნდა იყოს. მაგრამ არსებობს საკითხები, რომლებსაც სისხლის სამართლის კოდექსის შესაბამისი მუხლი განსაზღვრავს. სამწუხარო ფაქტია, მაგრამ თუკი ეს მუხლი დარღვეულია, მით უმეტეს, უხეშად, უნდა აგოს პასუხი. თუ არ არის დანაშაული, არც პასუხისგება იქნება. ჩვენ პოლიტიკურ ცხოვრებას ტურბულენტობა ახასიათებს და მუდმივად, ხან არჩევნების, ხან სხვა პოლიტიკური სტრესის პირობებში გვიხდება ცხოვრება. ეს იმას არ ნიშნავს, რომ არ უნდა გაგრძელდეს სამართლად წარმოება, ვის მიმართაც უნდა იყოს“, – განაცხადა გია ვოლსკიმ.
საქართველოს გენერალური პროკურატურის ინფორმაციით, გამოტანილია დადგენილება მამუკა ხაზარაძისა და ბადრი ჯაფარიძის ბრალდების შესახებ, მათ მიერ, ჯგუფურად, 16 754 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება, დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის „ა“ და მე-3 ნაწილის „გ“ ქვეპუნქტით“.
